سرکش مسافر کی ہنگامہ آرائی، طیارے کو ہنگامی لینڈنگ کرنا پڑگئی
شائع شدہ تاریخ 07 ستمبر, 2026
پولیس کے مطابق امریکی ائیر لائنز کی ڈلاس فورٹ ورتھ سے نیوارک کی پرواز کے فرسٹ کلاس کیبن میں سفر کے دوران 67 سالہ مسافر اچانک انتہائی جارحانہ ہوگیا۔
اس نے نسل پرستانہ اور توہین آمیز جملے کسے، اپنے ساتھ بیٹھی خاتون مسافر پر تشدد کیا، اس کے لیپ ٹاپ کو توڑ دیا اور بیچ بچاؤ کرانے والے دیگر افراد کو کاٹنے کی کوشش بھی کی۔
جب فلائٹ اٹینڈنٹ کے سمجھانے کے باوجود مسافر قابو میں نہ آیا اور جسمانی تشدد پر اتر آیا تو جہاز میں موجود ایک ریٹائرڈ پولیس افسر اور دیگر مسافروں نے عملے کی دی ہوئی ٹیپ اور رسیوں کی مدد سے اسے سیٹ سے مضبوطی سے باندھ دیا۔
اس ہنگامہ آرائی کی وجہ سے پائلٹ نے طیارے کا رخ موڑ کر واشنگٹن کے بالٹی مور ائیرپورٹ پر ہنگامی لینڈنگ کی جہاں پولیس اور ایف بی آئی نے طیارے میں داخل ہو کر مسافر کو حراست میں لے لیا۔
پولیس نے 67 سالہ سرکش مسافر کی شناخت آرتھر لنڈین (Arthur Lundeen) کے نام سے کی ہے۔
مسافر پر اب حملہ کرنے اور امن و امان میں خلل ڈالنے کے الزامات کے تحت مقدمہ چلایا جارہا ہے۔
