ریاض میں صوفہ فیکٹری میں آتشزدگی، 16 بنگلادیشی شہری جاں بحق
شائع شدہ تاریخ 11 اگست, 2026
بنگلادیش کی وزارت خارجہ نے کہا ہے کہ اتوار کے روز سعودی عرب کے دارالحکومت ریاض میں فیکٹری میں آتشزدگی کے نتیجے میں 16 بنگلا دیشی شہری جان کی بازی ہار گئے۔
بنگلادیشی سفارتخانے کے مطابق آگ ریاض کے الصِفا ضلع کے صنعتی علاقے میں واقع ایک صوفہ فیکٹری میں لگی۔
سفارتخانے نے بتایا کہ حادثے میں کوئی شخص زخمی نہیں ہوا، تاہم تمام متاثرہ افراد جاں بحق ہوگئے۔
بنگلادیش کے وزیر برائے اوورسیز ویلفیئر عریف الحق چوہدری نے کہا کہ سعودی عرب میں بنگلا دیشی سفارتخانے کے ذریعے مقامی حکام سے مسلسل رابطہ رکھا جا رہا ہے۔
انہوں نے کہا کہ حکام کو ہدایت کی گئی ہے کہ جاں بحق ہونے والے تارکین وطن کی میتیں جلد از جلد بنگلا دیش منتقل کرنے اور ان کے خاندانوں کو ضروری حکومتی امداد اور معاوضہ فراہم کرنے کے لیے اقدامات کیے جائیں۔
سعودی عرب کے سول ڈیفنس ادارے نے بھی دارالحکومت میں ایک غیر لائسنس یافتہ فرنیچر سازی کی جگہ پر لگنے والی آگ بجھانے کی تصدیق کی، تاہم اس نے ہلاکتوں کی تفصیلات فراہم نہیں کیں۔
واضح رہے کہ خلیجی ممالک کی طرح سعودی عرب بھی افرادی قوت کے لیے برصغیر سے آنے والے بڑی تعداد میں مزدوروں پر انحصار کرتا ہے۔ سعودی میڈیا کی رپورٹس کے مطابق 30 لاکھ سے زائد بنگلا دیشی شہری سعودی عرب میں مقیم ہیں۔
