خواتین کو ہراساں کرنے پر پولیس کانسٹیبل کا گھر میں گھس کر تشدد
شائع شدہ تاریخ 14 ستمبر, 2026
حافظ آباد میں سالگرہ کے فنکشن پر جانے والی خواتین کو مبینہ طور پر ہراساں کرنے کا واقعہ پیش آیا ہے، جس کے خلاف لواحقین کے احتجاج کرنے پر ملزم نے اپنے پولیس کانسٹیبل بھائی کو بلا لیا۔
پولیس کانسٹیبل پر اپنی وردی اور اختیارات کا مبینہ ناجائز استعمال کرتے ہوئے گھر میں گھس کر خواتین اور اہل خانہ پر بہیمانہ تشدد کرنے کا الزام ہے۔
اس واقعے کی ویڈیو سوشل میڈیا پر وائرل ہونے کے بعد ضلعی پولیس افسر (ڈی پی او) فواد احمد نے اس کا فوری نوٹس لے لیا۔
ڈی پی او کے نوٹس کے بعد محکمہ پولیس نے فوری کارروائی کرتے ہوئے ملوث کانسٹیبل کو معطل کر دیا ہے اور اس کے بھائی سمیت دونوں مرکزی ملزمان کو گرفتار کر لیا ہے۔
پولیس کے مطابق دیگر مفرور ملزمان کی گرفتاری کے لیے چھاپے مارے جا رہے ہیں اور قانون کے مطابق سخت کارروائی عمل میں لائی جائے گی۔
