عوام کیلئے بڑی خوشخبری، ڈیزل 32 روپے 63 پیسے فی لیٹر سستا
شائع شدہ تاریخ 20 اگست, 2026
پٹرولیم ڈویژن کی جانب سے جاری نوٹیفکیشن کے مطابق 20 اگست کے لیے ڈیزل 32 روپے 63 پیسے فی لیٹر سستا کیا گیا ہے۔
نوٹیفکیشن کے مطابق پیٹرول کی قیمت میں 2 روپے 97 پیسے فی لیٹر اضافہ کیا گیا ہے۔
نوٹیفکیشن کے مطابق ڈیزل کی فی لیٹرنئی قیمت 363 روپے 6 پیسے مقرر کی گئی ہے جب کہ پیٹرول کی نئی قیمت 337 روپے 51 پیسے فی لیٹر مقرر کی گئی ہے۔
دوسری جانب اوگرا ذرائع کے مطابق ڈیزل پر لیوی 1 روپے 72 پیسے فی لیٹر بڑھادی گئی، ڈیزل پر لیوی 80 روپے فی لیٹر کر دی گئی۔
اوگرا ذرائع کا کہنا ہے کہ پیٹرول پر 80 روپے فی لیٹر لیوی برقرار رہے مٹی کے تیل پر بھی لیوی 20 روپے 36 پیسے فی لیٹر برقرار ہے۔
خیال رہے کہ آج اسلام آباد میں پریس کانفرنس کرتے ہوئے وفاقی وزیر پیٹرولیم علی پرویز ملک کا کہنا تھا کہ حکومت کو عوام کی مشکلات اور تکالیف کا احساس ہے، جو بھی عوامی ریلیف ممکن ہو حکومت فوری دینے کی کوشش کرتی ہے، پیٹرولیم مصنوعات کی قیمتوں میں سبسڈی کا فیصلہ بھی اسی ریلیف کا حصہ تھا۔
علی پرویز ملک کا کہنا تھاکہ حکومت جو کوشش کررہی ہے اس سے یہ مشکل وقت ضرورت ختم ہوگا، حکومت عوام کو تحفظ دینے کی ہرممکن کوشش کرے گی، جنگ کی شدت میں اضافے سے پیٹرولیم مصنوعات کی قیمتوں میں اضافہ ہوا ہے، ڈیزل کی دستیابی سے متعلق کئی ممالک کو مسائل سامنا ہے۔
وزیر پیٹرولیم کا کہنا تھا کہ ڈیزل کی فی لیٹر قیمت میں 30 سے 32 روپے سے زائد کی کمی کا فیصلہ کیا گیا ہے۔
