تعلیم کیساتھ کھیل اور دوسری ہم نصابی سرگرمیاں بھی ضروری ، وی سی روبینہ فاروق فیصل آباد : ڈائریکٹو ریٹ آف سپورٹس گورنمنٹ کالج ویمن یونیورسٹی فیصل آباد کے زیر اہتمام چھٹے سالانہ سپورٹس فیسٹیول کا انعقاد کیا گیا جس کی مہمان خصوصی وائس چانسلر پروفیسر ڈاکٹر روبینہ فاروق تھیں جبکہ ان کے ہمراہ مہمان اعزاز چیئر پرسن سپورٹس سائنسز جی سی یونیورسٹی ڈاکٹر عابدہ نصیر ، رجسٹرار ڈاکٹر ظل ہما نازلی ، کوآرڈینیٹر آرٹس اینڈ سوشل سائنسز پروفیسر فرزانہ ہاشمی ، کوآرڈینیٹر سائنس اینڈ ٹیکنالوجی پروفیسر غزالہ سہیل، کوآرڈینیٹراسلامک اینڈ اورینٹل لرنگ پروفیسر رخشندہ شہناز ،ڈائریکٹر سپورٹس فرزانہ اعظم، کنٹرولر امتحانات رضوانہ تنویر رندھاوا ، ڈاکٹر شہلا قاسم، ڈائریکٹر سٹوڈنٹس افیئر اسما عزیز ، فیکلٹی ممبران اور طالبات نے تقریب میں شرکت کی۔ اس موقع پر وائس چانسلر پروفیسر ڈاکٹر روبینہ فاروق نے کہا تعلیم کے ساتھ ساتھ کھیل اور دوسری ہم نصابی سرگرمیاں بھی بہت ضروری ہیں۔ گورنمنٹ کالج ویمن یونیورسٹی کے نیو کیمپس میں حکومت کی مدد سے ان ڈور سپورٹس کمپلیکس، کرکٹ گرائونڈ ، باسکٹ بال گرائونڈ، فٹبال گرائونڈ تعمیر کیا جائے گا اور سپورٹس کی طالبات کو سکالر شپ و دیگر سہولیات فراہم کی جائیں گی تاکہ کالج کی طالبات نیشنل لیول کی کرکٹ ،فٹبال اور دیگر ٹیموں میں اپنی جگہ بنا سکیں ۔ آخرمیں پوزیشن ہولڈرز میں انعامات بھی تقسیم کئے گئے ۔