پاکستان تحریک انصاف کے 20 منحرف ارکانِ قومی اسمبلی کے خلاف نا اہلی ریفرنسز کے کیس کی سماعت کے دوران کئی الیکشن کمیشن آف پاکستان میں جواب جمع کرا دیئے۔ چیف الیکشن کمشنر سکندر سلطان راجہ کی زیرِ صدارت 3 رکنی کمیشن نے جمعہ 6 مئی کو کیس کی سماعت کی۔ اس موقع پر منحرف رکن نور عالم خان کے وکیل بیرسٹر گوہر نے الیکشن کمیشن کو بتایا کہ نور عالم خان کی جانب سے جواب جمع کروا دیا گیا ہے۔ عامر لیاقت حسین کے وکیل نے الیکشن کمیشن کو بتایا کہ عامر لیاقت حسین جواب پر دستخط کیلئے نہیں پہنچ سکے، وہ آج ہی دستخط کروا کر جواب جمع کروا دیں گے۔ دوسری جانب منحرف ارکان فرخ الطاف، عاصم نذیر، افضل خان دھاندلہ، نواب شیر وسیر، راجہ ریاض، احمد حسین ڈھیر، رانا قاسم نون، غفار وٹو، مخدوم سمیع الحسن گیلانی، مبین احمد، باسط سلطان، عامر گوپانگ، اجمل فاروق کھوسہ، ریاض مزاری، جویریہ ظفر، وجیہہ قمر، نزہت پٹھان، رمیش کمار نے بھی اپنا جواب الیکشن کمیشن میں جواب کروا دیا۔ سماعت کے آغاز میں پاکستان تحریک انصاف ( پی ٹی آئی) وکیل فیصل چوہدری نے کہا کہ ایم پی ایز کے کیس میں وکالت نامہ جمع کرانا چاہتے ہیں، عدم اعتماد جیسی صورت حال پنجاب اسمبلی میں بھی پیش آئی، عثمان بزدار کا استعفیٰ متنازع ہے۔ فیصل چوہدری نے مزید کہا کہ پنجاب میں نئے وزیراعلیٰ کے الیکشن کیلئے پی ٹی آئی ارکان کو ورغلایا گیا۔ پنجاب اسمبلی میں منحرف ارکان نے ووٹ ڈال دیئے ہیں۔ پی ٹی آئی کے وکیل فیصل چوہدری نے الیکشن کمیشن سے مزید وقت کی استدعا کرتے ہوئے کہا کہ ہمیں جواب کا جائزہ لینے کا وقت دیا جائے۔ پی ٹی آئی کے وکیل کا یہ بھی کہنا تھا کہ جتنے جواب آ چکے ہیں، انہیں ایک دن میں پڑھ کر جواب دینا مشکل ہوگا، مناسب ہوگا کہ دلائل منگل کے لیے رکھ لیں۔ چیف الیکشن کمشنر نے کہا کہ ہمیں تو لگ رہا تھا کہ منحرف ارکان کے وکلاء وقت مانگیں گے۔ الیکشن کمیشن بلوچستان کے ممبر شاہ محمد جتوئی نے کہا کہ 14 مئی تک کمیشن نے فیصلہ کرنا ہے۔ اس دوران چیف الیکشن کمشنر نے ہدایت دی کہ منگل 10 مئی تک ہر صورت دلائل مکمل کرلیں تاکہ فیصلے کیلئے وقت مل سکے۔ چیف الیکشن کمشنر نے فریقین کو دلائل دینے کی ہدایت کرتے ہوئے کہا کہ کل دونوں فریقین کے دلائل سنیں گے۔ منحرف ارکان کے وکیل نے کہا کہ اگر جواب الجواب آیا تو تیاری کے لیے وقت درکار ہوگا۔ کیس کی مزید سماعت کل تک ملتوی کر دی گئی۔ واضح رہے کہ گزشتہ ماہ تحریک انصاف نے 25 منحرف اراکین پنجاب اسمبلی کے خلاف ریفرنس پر جلد کارروائی کے لیے الیکشن کمیشن کو خط بھی لکھا تھا۔