وزیراعظم عمران خان کی زیرصدارت وفاقی کابینہ کا اہم اجلاس آج بروز منگل 12 اکتوبر کو طلب کیا گیا ہے۔ اجلاس میں ملکی سیاسی و معاشی صورت حال کا جائزہ لیا جائے گا۔ وفاقی کابینہ کے اجلاس میں افغانستان کی صورت حال پر بھی تبادلہ خیال کیا جائے گا۔ اجلاس کا 12 نکاتی ایجنڈا جاری کردیا گیا ہے۔ وفاقی کابینہ کے اجلاس میں وزارتوں، ڈویژنز میں خالی آسامیوں پر اسٹیبلشمنٹ ڈویژن رپورٹ پیش کرے گی۔ کابینہ پیمرا کونسل آف کمپلینٹس کی تشکیل نو اور اسپیشل رائٹس فورس کے قیام کی منظوری دے گی۔ سی پیک کیٹیگری ویزہ میں اتھارٹی کو بطور اہم اسٹیک ہولڈر شامل کرنے کی منظوری ایجنڈے کا حصہ ہے، جب کہ افغان شہریوں کی پاکستان آمد کے لیے ویزہ فیس میں کمی کی منظوری بھی ایجنڈے میں شامل ہے۔ وزارت داخلہ کی 8 ڈالر سے زائد ویزہ فیس میں چھوٹ کی سمری کی منظوری، اوور سیز پاکستانیوں کے لیے پاور آف اٹارنی کے اجرا کے لیے آٹومیشن نظام کی منظوری ایجنڈے میں شامل ہے۔ میڈیکل اور ڈینٹل کالجز میں داخلے کے لیے میرٹ کا نظام وفاقی ریگولیٹر کے ماتحت کرنے کی سمری سمیت ای سی سی اور کابینہ کمیٹی ٹرانسپورٹ و لاجسٹک کے فیصلوں کی توثیق بھی ایجنڈے میں شامل ہے۔