ریاست مدینہ کے وژن کی تکمیل میں عورتوں کو حقوق فراہم کرنا اہم قدم ہے، عمران اسماعیلایپلی کیشن ’’بیٹی‘‘ کے اجراکی تقریب سے خطاب،خالدمقبول صدیقی، میئرو دیگرکی شرکت کراچی : گورنر سندھ عمران اسماعیل نے ایپلی کیشن ’’بیٹی‘‘ کے اجرا کی تقریب سے خطاب کرتے ہوئے کہا ہے کہ وفاقی حکومت عوام کی فلاح و بہبود کے لیے ملکی تاریخ کا سب سے بڑا سوشل پروگرام ’’احساس‘‘ لے کر آئی ہے ۔ تقریب میں ڈاکٹر خالد مقبول صدیقی ، میئر وسیم اختر سمیت دیگر اعلیٰ حکام بھی شریک تھے۔ گورنر سندھ نے مزید کہا کہ وزیر اعظم کے ریاست مدینہ کے وژن کی تکمیل میں عورتوں کو حقوق فراہم کرنا ایک اہم قدم ہے۔ اس ضمن میں ’’بیٹی‘‘ ایپ کا اجرا خوش آئند ہے ۔ ایپ بنانے کا کریڈٹ ڈاکٹر خالد مقبول صدیقی اور وزارت انفارمیشن ٹیکنالوجی کو جاتا ہے۔ گورنر سندھ نے مزید کہا کہ بیٹی ایپلی کیشن پاکستان میں عورتوں کو بااختیار بنائے گی، اس ایپ کا مقصد بیٹیوں کو ان کے حقوق کی آگاہی اور دیگر سہولتیں مہیا کرنا ہے ۔ انہوں نے کہا کہ پاکستان میں خواتین کی آبادی پچاس فیصد سے زائد ہے، بدقسمتی سے اکثر خواتین کو گھر سے باہر جا کر کام کرنے کی اجازت نہیں ہوتی، اگر خواتین کو گھر سے اجازت ملتی ہے تو وہ عملی زندگی میں مردوں سے آگے نکل جاتی ہیں۔ ہماری خواتین ذہین ہیں، انہیں ان کی اپنی پسند کی فیلڈ میں آگے بڑھنے کا موقع ملنا چاہیے، ہمیں اپنی خواتین کو با اختیار بنانا ہوگا تاکہ ملک ترقی کی منازل طے کر سکے۔