بڑے ادیبوں نے معروف شاعرہ کے کام کو سراہا جو نہایت خوش آئند بات ہے، انور مقصودآرٹس کونسل میں ثبین سیف کے اعزاز میں تقریب سے ڈاکٹر پیرزادہ قاسم کا بھی خطاب کراچی : مرد اگر چاہے تو اپنے کردار سے خواتین کو ان کا مقام دلوا سکتا ہے، ثبین سیف کی شاعری میں وہ تمام جذبات موجود ہیں جو انہوں نے زندگی کے مختلف رشتوں میں رہتے ہوئے محسوس کیے۔ ان خیالات کا اظہارصوبائی وزیر برائے ترقی نسوا ں اور سابق ڈپٹی اسپیکر سندھ اسمبلی شہلا رضا نے آرٹس کونسل آف پاکستان کراچی میں یوتھ کمیٹی کے زیر اہتمام معروف شاعرہ ثبین سیف کے اعزازمیں رکھی گئی ایک تقریب سے خطاب کرتے ہوئے کیا۔ انہوں نے مزید کہاکہ ثبین سیف کی شاعری ان کے خیالات اور احساسات کی عکاسی ہے۔ معروف مصنف و مزاح نگار انور مقصود نے کہاکہ اچھی غزل لکھنا دنیا کا مشکل ترین کام ہے ، ثبین بہترین شاعرہ ہیں وہ جو کچھ اپنے بارے میں کہنا چاہتی ہیں کہہ دیتی ہیں۔ ان کی غزل ’’مجھے تنہائی میں رہنے دو‘‘ بہترین تخلیق ہے ، بڑے ادیبوں اور شاعروں نے ان کے کام کو سراہا جو نہایت خوش آئند بات ہے۔ اس موقع پر ڈاکٹر پیرزادہ قاسم رضا صدیقی نے کہا کہ ثبین جتنی اچھی شاعرہ ہیں اس سے بھی زیادہ اچھی خاتون خانہ ہیں، ان کا گھر اس افراتفری کے دور میں خوشحالی کی مثال ہے، وہ ایک سچی اور اچھی شاعرہ ہیں۔ شاعرہ ثبین سیف نے اپنے خیالات کا اظہار کرتے ہوئے کہاکہ آج تک کوئی جذبہ میری ممتا کے جذبے پر حاوی نہیں ہو سکا اور یہی میری طاقت ہے ، میں خواتین کی حمایت میں لکھتی ہوں، میں نے درد اور جذبات کو شاعری کی زبان میں لوگوں تک پہنچانے کی کوشش کی ہے۔