ای پاسپورٹس اجرا کے لئے فیس شیڈول کا اعلان کر دیا گیا۔ وفاقی حکومت کی منظوری سے ای پاسپورٹس اجرا کے لئے فیس شیڈول کا اعلان کردیا گیا ہے، ابتدائی طور پر ای پاسپورٹس کے اجرا کا آغاز صرف اسلام آباد سے کیا جا رہا ہے، ملک بھر کے دیگر پاسپورٹس دفاترسےای پاسپورٹ اجرا کی تاریخ کا اعلان بعد میں کیا جائے گا۔ فیس شیڈول کا اطلاق ڈپلومیٹیک، آفیشل اور آرڈنری کیٹیگری کے لئے کیا گیا ہے، جب کہ عام شہریوں کوای پاسپورٹ کا اجرا موجودہ پاسپورٹ کی مدت کے اختتام پر کیا جائے گا۔ 36 صفحات کے 5 سالہ ای پاسپورٹ کے لئے نارمل فیس 9 ہزار اور ارجنٹ فیس 15 ہزارروپے مقرر کی گئی ہے۔ جب کہ 36 صفحات کے 10 سالہ پاسپورٹ کے لئے نارمل فیس 13 ہزار5 سو اور ارجنٹ فیس 22 ہزار 5 سو روپے لی جائے گی۔ 72 صفحات کے 5 سالہ ای پاسپورٹ کی نارمل فیس 16 ہزار 5 سو اور ارجنٹ 27 ہزار 500 روپے مقرر کی گیئ ہے، اور 72 صفحات کے 10 سالہ ای پاسپورٹ کی نارمل فیس 24 ہزار750 جب کہ ارجنٹ فیس40 ہزار500 روپے ہوگی۔ فیس کی ادائیگی نیشنل بینک، موبائل ایپ، موبی کیش اور ایزی پیسہ سے بھی کی جا سکتی ہے۔