عامر انگلینڈ یا کسی دوسرے ملک کے لیے کرکٹ نہیں کھیل رہے:نرجس عامر لاہور قومی کرکٹ ٹیم کے فاسٹ باﺅلر محمد عامر کی 27 سال کی عمر میں ٹیسٹ کرکٹ سے ریٹائرمنٹ پر تنقید کرنےوالوں کےخلاف ان کی اہلیہ نرجس عامر میدان میں آگئیں۔ تفصیلات کے مطابق قومی کرکٹ ٹیم کے فاسٹ باﺅلر محمد عامر کی ٹیسٹ کرکٹ سے ریٹائرمنٹ کے بعد سے ان پر کچھ حلقوں کی جانب سے تنقید کی جارہی ہے، سماجی رابطے کی ویب سائٹ ٹویٹر پر عامر کی اہلیہ نے ردعمل دیتے ہوئے لکھا کہ ” مجھے شوہر کی ٹیسٹ کرکٹ سے ریٹائرمنٹ پر وضاحت دینے کی ضرورت نہیں تھی تاہم ان پر تنقید پر یہ کہنا چاہوں گی کہ عامر انگلینڈ یا کسی دوسرے ملک کے لیے کرکٹ نہیں کھیل رہے ہیں، عامر کو پاکستانی ہونے پر فخر ہے، وہ پاکستان کے لیے کھیلتے ہیں اور پاکستان کی نمائندگی کرنا پسند کرتے ہیں، وہ صرف ٹیسٹکرکٹ سے ریٹائر ہوئے ہیں، انہوں نے کرکٹ کو خیرآباد نہیں کیا ہے، وہ ون ڈے اور ٹی ٹونٹی کرکٹ کھیلتے ہوئے ملک کی نمائندگی کریں گے،نرجس عامر نے کہا کہ میں دعاگو ہوں کہ اللہ ان لوگوں کو ہدایت دے جو عامر کو ریٹائرمنٹ کو لے کر ان پر تنقید کررہے ہیں ،آمین“۔ https://twitter.com/narjiskhan25/status/1156236928737513473 واضح رہے کہ محمد عامر نے ٹیسٹ کرکٹ سے کنارہ کشی اختیار کرلی ہے اس کے بعد کرکٹ حلقوں کی جانب سے ان پر تنقید کا سلسلہ جاری ہے۔سابق کرکٹر رمیز راجہ نے بھی ان پر تنقید کرتے ہوئے کہا تھا کہ یہ جانے کا نہیں لوٹانے کا وقت ہے، سپاٹ فکسنگ کے دوران بورڈ نے ان کو ٹیم میں واپس لانے کے لیے بہت پیسہ خرچ کیا ہے۔