نئے نوول کورونا وائرس کی وبا دنیا بھر میں بہت تیزی سے پھیل رہی ہے اور ہوسکتا ہے کہ آپ سوچتے ہوں کہ اس صورتحال میں خود کو صحت مند کیسے رکھیں؟ کیا کوئی ایسی جادوئی چیز ہے جو آپ کو اس سے بچاسکتی ہے؟ تو پہلے تو یہ جان لیں کہ انٹرنیٹ بلکہ سوشل میڈیا پر متعدد دعوئوں کے باوجود ایسی کوئی جادوئی غذایا گولی نہیں جو مدافعتی نظام کو مضبوط بناکر کورونا وائرس سے تحفظ فراہم کرسکے۔ مگر اچھی خبر یہ ہے کہ ایسے متعدد ذرائع موجود ہیں جو مدافعتی نظام کے افعال کو درست رکھنے میں مدد دیتے ہیں، جس سے صحت مند رہنا ممکن ہوسکتا ہے اور کورونا وائرس کے خلاف جسم کو لڑنے میں بھی مدد مل سکتی ہے۔تحریر جاری ہے‎ ان میں ہاتھوں کی مناسب صفائی، اچھی غذا کا خیال، جسمانی طور پر متحرک رہنا، مراقبہ، اچھی نیند اور تنائو کو کنٹرول رکھنا شامل ہے۔ مدافعتی نظام کو مضبوط بنانے کے لیے غذا کی اہمیت سے انکار ممکن نہیں اور اس کے لیے چند غذائی عناصر کا استعمال کرنا مفید ثابت ہوسکتا ہے۔ گاجر اور خوبانی بیٹا کیروٹین سے بھرپور بیٹاکیروٹین جسم میں وٹامن اے میں تبدیل ہوجاتا ہے، جو کہ مضبوط مدافعتی نظام کے لیے ضروری جز ہے۔ یہ زہریلے اور بیرونی مواد کے خلاف اینٹی باڈیز کے ردعمل میں مدد دیتا ہے۔ بیٹا کیروٹین کے حصول کے اچھے ذرائع میں شکرقندی، گاجر، آم، خوبانی، پالک اورمیٹھا کدو قابل ذکر ہیں۔ مالٹے اور اسٹرابیری وٹامن سی کے لیے وٹامن سی خون میں اینٹی باڈیز کی سطح بڑھانے اور خون کے سفید خلیات کے افعال میں مدد دیتا ہے، جس سے جسم کو یہ تعین کرنے مین مدد ملتی ہے کہ اسے کس قسم کے تحفظ کی ضرورت ہے۔ کچھ تحقیقی رپورٹس کے مطابق وٹامن سی کی زیادہ مقدار کا استعمال موسمی نزلہ زکام کے دورانیے میں معمولی کمی لاسکتا ہے۔ اس کے لیے روزانہ 200 ملی گرام وٹامن سی کی ضرورت ہوتی ہے اور اس کے لیے مالٹے، گریپ فروٹ، کیوی، اسٹرابیری، شملہ مرچ، سبز مرچ وغیرہ سے مدد لی جاسکتی ہے۔ وٹامن ڈی ایک پروٹین کو بنانے کے عمل کو ریگولیٹ کرتا ہے جو وبائی ایجنٹس بشمول بیکٹریا اور وائرسز کو مارتا ہے۔ وٹامن ڈی خون کے سفید خلیات کی مقدار اور سرگرمیوں کو بھی بدلتا ہے جو بیکٹریا اور وائرس کے پھیلائو کو کم کرنے میں مدد دیتا ہے۔ زنک ایسا غذائی جز ہے جو مدافعتی نظام کی نشوونما میں مدد دیتا ہے۔ ایک تحقیق میں بتایا گیا کہ زنک سپلیمنٹس موسمی نزلہ زکام کی علامات کا دورانیہ کم کرسکتے ہیں، مگر اس حوالے سے مزید تحقیق کی ضرورت پر بھی زور دیا گیا۔