ہماری ٹیم خود کو بہت محفوظ تصور کر رہی ہے ،مستقبل میں ہم ہر طرح کا فارمیٹ کھیلنے کیلئے پاکستان آئیں گے ،یہاں کرکٹ سے محبت کرنیوالے لوگ رہتے ہیں آئی سی سی ٹیسٹ چیمپئن شپ بہترین آئیڈیا ہے ،کراچی ٹیسٹ کیلئے ٹیم میں ایک تبدیلی کرینگے ،فائنل الیون کا فیصلہ وکٹ دیکھ کر کیاجائے گا:سری لنکن کپتان کراچی: سری لنکا کرکٹ ٹیم کے کپتان دیموتھ کرونارتنے نے ون ڈے اور ٹی20 سیریز کیلئے پاکستان کا دورہ نہ کرنے پر افسوس کا اظہار کرتے ہوئے کہا ہے کہ پاکستان میں کرکٹ سے محبت کرنے والے لوگ رہتے ہیں، پاکستان ایک محفوظ ملک ہے اور ہماری ٹیم یہاں خود کو بہت محفوظ تصور کر رہی ہے ۔نیشنل سٹیڈیم کراچی میں پری میچ پریس کانفرنس سے خطاب کرتے ہوئے دیموتھ کرونارتنے نے کہاکہ میں اور میری ٹیم پاکستان میں بہت محفوظ تصور کر رہے ہیں، میں کہہ سکتا ہوں کہ پاکستان کرکٹ کیلئے محفوظ ملک ہے ۔ایک سوال کے جواب میں انہوں نے کہا کہ مجھے پچھتاوا ہے کہ میں نے ٹی20 اور ون ڈے میچوں کی سیریز کیلئے پاکستان کا دورہ نہیں کیا تھا لیکن اس وقت یہ فیصلہ کرنا بہت مشکل تھا کیونکہ میں پہلے کبھی پاکستان نہیں آیا تھا۔اس وقت خبروں اور سوشل میڈیا پر پاکستان کے بارے میں کچھ مثبت خبریں بھی نہیں چل رہی تھیں جس کی وجہ سے میں نے نہ آنے کا فیصلہ کیا لیکن جو کھلاڑی یہاں سے ہو کر گئے انہوں نے کافی اچھی باتیں کیں جس کے بعد ہمارے تمام سینئر کھلاڑیوں نے ٹیسٹ سیریز کیلئے یہاں آنے کا فیصلہ کیا۔ انہوں نے کہا کہ مجھے ماضی میں ٹیم کے ساتھ ٹی20 اور ون ڈے میچوں کیلئے پاکستان نہ آنے پر پچھتاوا ہے لیکن مستقبل میں ہم ہر طرح کا فارمیٹ کھیلنے کیلئے پاکستان آئیں گے ۔جب سری لنکن کپتان سے سوال کیا گیا کہ بنگلہ دیش کو پاکستان کو دورے پر آنا چاہیے یا نہیں اور وہ انہیں کیا پیغام دیں گے تو انہوں نے کہا کہ میں یہ نہیں کہہ سکتا کہ انہیں آنا چاہیے یا نہیں لیکن اگر آپ مجھ سے پوچھیں میں خود پاکستان میں بہت محفوظ تصور کرتا ہوں، سکیورٹی اہلکار 100فیصد سے بڑھ کر کارکردگی دکھا کر ہمیں تحفظ فراہم کر رہے ہیں، ہم بہت اچھا محسوس کررہے ہیں ۔ دیموتھ کرونارتنے نے کہاکہ کراچی ٹیسٹ کیلئے ہماری ٹیم میں ایک تبدیلی ہو گی ، کاسن رجیتھا ٹیم کا حصہ نہیں ہونگے تاہم فائنل الیون کا فیصلہ میچ سے قبل وکٹ دیکھ کرکرینگے ۔وکٹ پر گھاس ہوئی تو 3فاسٹ باؤلرز کو موقع دینگے اورگھاس نہ ہوئی تو 3سپنرزکیساتھ میدان میں اتریں گے ۔انہوں نے آئی سی سی ٹیسٹ چیمپئن شپ کو ایک بہترین آئیڈیا قرار دیتے ہوئے کہا کہ گزشتہ دو سال سے ہم ہوم اور اوے ٹیسٹ سیریز کھیل رہے تھے لیکن اب سخت مقابلہ ہے ، آپ 12 ہوم اور اوے میچ کھیلیں گے ، اگر آپ ہوم سیریز میں اچھا کھیل پیش کرتے ہیں تو آپ کو اوے سیریز میں بہتر کھیل پیش کرنا ہو گا تاکہ آپ پوائنٹس ٹیبل پر اچھی پوزیشن حاصل کر سکیں۔