اسلام آباد: وزیر اعظم عمران خان نے آج صبح اپنے ٹویٹر اکاؤنٹ پر نظم و ضبط کا خصوصی پیغام جاری کیا ہے۔ وزیر اعظم نے اپنے ٹویٹ میں لکھا ‘عوام کے لیے میرا پیغام ہے کہ جس قدر ممکن ہو خود کو گھروں تک محدود رکھیں۔’ وزیر اعظم کا کہنا تھا کہ لوگ جتنا زیادہ نظم و ضبط رکھیں گے اتنا ہی حکومت کے لیے کرونا وائرس کی وبا سے نمٹنا آسان ہوگا۔ انھوں نے لکھا کہ لوگوں کے نظم و ضبط ہی سے بندشوں میں مرحلہ وار نرمی بھی ممکن ہو پائے گی۔ https://twitter.com/ImranKhanPTI/status/1252077711771697153 واضح رہے کہ پاکستان میں کرونا وائرس سے ہلاکتوں سے صورت حال تشویش ناک ہو گئی ہے، مزید 18 اموات کے بعد مجموعی تعداد 168 ہو گئی، گزشتہ 24 گھنٹوں کے دوران مزید 514 کیسز بھی رپورٹ ہوئے، جس کے بعد ملک میں کیسز کی مجموعی تعداد 8,348 ہو گئی ہے۔ نیشنل کمانڈ اینڈ آپریشن سنیٹر کے مطابق 5966 افراد زیر علاج ہیں، 1868 مریض صحت یاب ہو چکے ہیں، خیبر پختون خوا میں ایک ہی دن میں 10 اموات واقع ہوئیں، سندھ میں قاتل وائرس نے مزید 8 افراد کی جان لے لی۔