اسلام آباد : چیئرمین پی ٹی آئی عمران خان کا کہنا ہے کہ ملک فیصلہ کن موڑ پر ہے اور ادارے اپنا کام نہیں کر رہے۔ نائنٹی ٹو نیوز کے پروگرام ہارڈ ٹاک پاکستان میں انٹرویو دیتے ہوئے کہا کہ سپریم کورٹ تحفظ دے، پٹیشن دائر کرنا چاہتے ہیں پرامن احتجاج کا حق ہے یا نہیں؟ سپریم کورٹ کی آزمائش ہو گی تحفظات دور کرتی ہے یا نہیں؟ اس کا فیصلہ آنے کے بعد دو مختلف اسٹرٹیجیز ہوں گی۔ عمران خان نے مزید کہا کہ ویڈیوز آنا شروع ہوگئیں تھیں، ڈی چوک کی صورتحال ٹھیک نہیں، خون خرابے کے خدشے پر آگے نہ جانے کا فیصلہ کیا، مجھے خوف  تھا کہ  انتشار ہو گا اور پولیس گردی ہو گی، نون لیگ صورتحال کا فائدہ اٹھا ئے گی، اس بار پوری تیاری کے ساتھ سڑکوں پر نکلیں گے۔ اُنہوں نے کہا کہ آپ کشمیریوں کے حوالے سے سودا کرنے کو تیار ہیں تو آپ کے ہمسایہ ممالک کے ساتھ تعلقات اچھے ہو جائیں گے، چینی سرمایہ کار آتے ہیں توان کو ٹھیک طریقے سے ڈیل ہی نہیں کیا جاتا، چینی سرمایہ کاروں کے پاس اور بہت سے ملک ہیں سرمایہ کاری کیلئے۔ عمران خان کا کہنا تھا کہ اصل میں ہم پھنس گئے کرونا وائرس کی وجہ سے، ورنہ ہماری معیشت ٹھیک سمت میں جارہی تھی۔