لاہور: لاہور میں اب تک کورونا وائرس کی وجہ سے 545 افراد جاں بحق ہو چکے ہیں۔ محکمہ صحت پنجاب کے مطابق وفاقی دارالخلافہ لاہور پنجاب میں کورونا وائرس کی وجہ سے سب سے زیادہ متاثر ہے جہاں اب تک کورونا وائرس سے متاثرہ مریضوں کی تعداد 33 ہزار 811 تک پہنچ چکی ہے۔ لاہور میں کورونا وائرس کے 2 ہزار 246 مریض صحت یاب ہو چکے ہیں۔واضح رہے کہ پاکستان میں گزشتہ 24 گھنٹوں کے دوران کورونا کے سبب مزید 89 اموات رپورٹ ہوئیں جس کے بعد اموات کا مجموعہ 3 ہزار 590 ہو گیا ہے۔ ملک بھر سے کورونا وائرس کے مزید 4 ہزار 471 کیسز رپورٹ ہوئے جس کے بعد متاثرہ افراد کی تعداد ایک لاکھ 81 ہزار 88 ہو گئی۔نیشنل کمانڈ اینڈ آپریشن سنٹر کی جانب سے جاری کیے گئے اعدادوشمار کے مطابق ملک بھر میں کورونا سے متاثرہ 71  ہزار 458 مریض صحت یاب ہو گئے۔ پاکستان کے صوبہ پنجاب میں کورونا کے اب تک 66 ہزار 943 کیسز رپورٹ ہو چکے ہیں۔ سندھ میں 69 ہزار 628، خیبرپختونخوا میں 21 ہزار 997، بلوچستان میں 9 ہزار 475، اسلام آباد میں 10 ہزار 912، آزادکشمیر میں 845 اور گلگت بلتستان میں ایک ہزار 288 کیسز رپورٹ ہو چکے ہیں۔ کورونا وائرس کے باعث سب سے زیادہ اموات پنجاب میں ہوئی ہیں جہاں ایک ہزار 435 افراد جان کی بازی ہار چکے ہیں۔ سندھ میں ایک  ہزار 89، خیبر پختونخوا میں 821، اسلام آباد میں 101، گلگت بلتستان میں 22، بلوچستان میں 102 اور آزاد کشمیر میں 20 افراد کورونا وائرس سے جاں بحق ہو چکے ہیں۔ پاکستان میں کورونا کا پہلا کیس 26 فروری کو رجسٹرڈ ہوا اور ایک ہزاراموات 21 مئی تک ہوئیں۔ وزارت صحت کا کہنا ہے کہ ابتدا میں کیسز میں اضافے کی رفتار سست تھی لیکن اب اس میں تیزی سے اضافہ دیکھنے میں آرہا ہے۔