ناردرن کو ایک اننگز اور 16 رنز سے شکست دے دی،ڈبل سنچری بنانیوالے عمر اکمل اور میچ میں 11 وکٹیں لینے والے بلال آصف مشترکہ مین آف دی فائنل قرار ظفر گوہر کو پلیئر آف دی ٹورنامنٹ،عمران بٹ کو بہترین بلے باز اور نعمان علی کو ایونٹ کے بہترین باؤلر کا ایوارڈ دیا گیا،فاتح ٹیم کو 1کروڑ کی انعامی رقم دی گئی کراچی: سنٹرل پنجاب نے ناردرن کو ایک اننگز اور 16 رنز سے شکست دے کر قائداعظم ٹرافی جیت لی، ڈبل سنچری سکور کرنے والے عمر اکمل اور میچ میں 11 وکٹیں حاصل کرنے والے بلال آصف مشترکہ طور پر مین آف دی فائنل قرار دئیے گئے ۔نیشنل سٹیڈیم کراچی میں کھیلے گئے قائداعظم ٹرافی کے فائنل میں سنٹرل پنجاب نے ناردرن کو ایک اننگز اور 16رنز سے شکست دیدی۔ دوسری اننگز میں 421رنز کے خسارے کا شکار ناردرن کی پوری ٹیم 405رنز بناکر آؤٹ ہوگئی۔ سنٹرل پنجاب کے سپنر بلال آصف نے دوسری اننگز میں 8کھلاڑیوں کو پویلین کی راہ دکھائی۔ میچ کے چوتھے روز ناردرن کے اوپنر حیدر علی نے فیضان ریاض کے ہمراہ 2وکٹوں کے نقصان پر 109رنز سے کھیل کا دوبارہ آغاز کیا تو نوجوان اوپنر نے عمدہ بیٹنگ کرتے ہوئے شاندار سنچری سکور کی۔ وہ 134رنز بناکر آؤٹ ہوئے ۔203 گیندوں کا سامنا کرنیوالے حیدر علی کی اننگز میں 22چوکے اور 1چھکا شامل تھا، جسکے بعد ناردرن کے مڈل آرڈر بلے باز علی سرفراز اور روحیل نذیر نے کچھ مزاحمت کی تاہم وہ بھی ٹیم کو اننگز کی شکست سے بچانے میں ناکام رہے ۔ علی سرفراز 81اور روحیل نذیر 70رنز بنا کر آؤٹ ہوئے ۔ ناردرن کی پوری ٹیم 111.3اوورز میں 405رنز بناکر آؤٹ ہوگئی۔ سنٹرل پنجاب کے بلال آصف نے دوسری اننگز میں 112رنز دے کر 8کھلاڑیوں کو آؤٹ کیا۔ اس سے قبل ناردرن کے 254رنز کے جواب میں سنٹرل پنجاب نے 8 وکٹوں کے نقصان پر 675 رنز بناکر اپنی پہلی اننگز ڈکلیئر کردی تھی۔ فائنل میں ڈبل سنچری سکور کرنے پر سنٹرل پنجاب کے مڈل آرڈر بیٹسمین عمر اکمل اور 11 وکٹیں حاصل کرنے والے بلال آصف کو مشترکہ طور پر مین آف دی فائنل کا ایوارڈ دیا گیا۔ سنٹرل پنجاب کے ظفر گوہر کو پلیئر آف دی ٹورنامنٹ قرار دیا گیا۔ بلوچستان کے عمران بٹ ٹورنامنٹ کے بہترین بلے باز اور ناردرن کے کپتان نعمان علی کو ٹورنامنٹ کے بہترین باؤلر کا ایوارڈ دیا گیا۔ وکٹوں کے پیچھے سب سے زیادہ شکار کرنے پر سنٹرل پنجاب کے کامران اکمل کوٹورنامنٹ کا بہترین وکٹ کیپر قرار دیا گیا۔ ایونٹ کی فاتح سنٹر ل پنجاب کی ٹیم کو 1کروڑ روپے کی انعامی رقم دی گئی۔ ناردرن کی ٹیم رنرزاپ کی حیثیت سے 50لاکھ روپے کی حقدار ٹھہری۔