ایران کی ورلڈ کپ میں شرکت یقینی، فیفا صدر نے تصدیق کر دی
شائع شدہ تاریخ 17 اپریل, 2026
انفانٹینو نے نشریاتی ادارے سی این بی سی کی جانب سے منعقدہ ایک اقتصادی کانفرنس سے خطاب کرتے ہوئے کہا کہ مشرقِ وسطیٰ میں جاری جنگ کے باوجود ایران 2026ء کے ورلڈ کپ میں یقینی طور پر شرکت کر رہا ہے، ہم امید کرتے ہیں کہ اس وقت تک صورتِ حال پُرامن ہو جائے گی۔
انہوں نے کہا کہ ایران کو آنا ہے، وہ اپنے عوام کی نمائندگی کرتے ہیں، وہ کوالیفائی کر چکے ہیں اور کھلاڑی کھیلنا چاہتے ہیں۔
انفانٹینو اس سے قبل مارچ میں بھی اسی نوعیت کے خیالات کا اظہار کر چکے ہیں، جب انہوں نے ترکی کے شہر انطالیہ میں ایران اور کوسٹاریکا کے درمیان دوستانہ میچ میں شرکت کی تھی۔
شیڈول کے مطابق ایران اپنے گروپ جی کے تینوں میچز امریکا میں کھیلے گا، 2 لاس اینجلس میں اور 1 سیاٹل میں جبکہ ٹورنامنٹ کے دوران ٹیم کا بیس ٹکسن، ایریزونا میں ہو گا۔
امریکا، کینیڈا اور میکسیکو کی مشترکہ میزبانی میں ہونے والے اس عالمی ٹورنامنٹ میں ایران کی شرکت 28 فروری کو امریکا اور اسرائیل کی جانب سے ایران پر مسلط کردہ جنگ کے بعد غیر یقینی صورتِ حال کا شکار ہو گئی تھی۔
