روپے کی قدر میں کمی سے افراط زر 15 فیصد تک پہنچ سکتا ہے کراچی آنے والے دنوں میں روپے کی قدر میں مزید کمی کا امکان ہے۔ تفصیلات کے مطابق نجی ٹی وی چینل کے پروگرام میں بات کرتے ہوئے ماہر معاشیات ڈاکٹر حفیظ پاشا نے کہا ہے کہ آنے والے دنوں میں روپے کی قدر میں مزید کمی آئے گی۔انہوں نے کہا کہ موجودہ حالات میں برآمدات میں 8 فیصد اضافہ حاصل کرنا ایک چیلنج ہو گا جس کے لئے حکومت کو روپے کی قدر میں کمی کرنا پڑے گی اور اس کی وجہ سے افراط زر 15 فیصد تک پہنچ سکتا ہے۔ان کا کہنا تھا کہ عالمی مالیاتی ادارے آئی ایم ایف نے پاکستان کے حوالے سے جو اعداد و شمار دیے ان میں بہت غلطیاں ہیں جس پر حیرت ہوئی ہے۔ انہوں نے کہا کہ محصولات میں تیزی سے اضافہ کرنے کے حکومت کو درآمداتی ڈیوٹی اور سیلز ٹیکس میں بھی مزید اضافہ درکار ہو گا۔ ان کا کہنا تھا کہ اگر درآمدات میں اضافہ نہیں کیا گیا تو حالات بد سے بدتر ہوتے چلے جائیں گے جس کا یہ ملک متحمل نہیں ہو سکتا۔پروگرام میں موجود ماہر معاشیات محمد زبیر نے کہا ہے کہ آئی ایم ایف کا یہ پروگرام بہت ناقص ہے، اس سے قرضوں میں مزید اضافہ ہو گا۔ ان کا کہنا تھا کہ آئی ایم ایف کا یہ پروگرام پاکستان کو ڈیفالٹ سے بچانے کے لیے ہے۔ ہمارے ملک میں ڈالر کی کمی اصل بحران ہے، مشیر خزانہ نے جتنی بھی تقریریں کی ہیں اس میں درآمدات میں اضافے کے حوالے سے کوئی بات نہیں کی، جب تک درآمدات میں اضافہ نہیں ہوگا یہ بحران ختم نہیں ہو گا۔فوج نے تو اپنے اخراجات میں کمی کر دی لیکن اس حکومت نے کوئی کمی نہیں کی بلکہ جو پیسہ وہاں سے بچ رہا ہے یہ لوگ اسے بھی خرچ کر رہے ہیں۔ اُن کا مزید کہنا تھا کہپاکستان کا سویت یونین جیسا حساب ہونے لگا ہے، پاک فوج کے معیشت کے حوالے سے خدشات بالکل جائز ہیں۔