جنوبی پنجاب اور بہاولپور سے متعلق قراردادیں بے اثر ہو چکیں: رانا ثنا اللہ
شائع شدہ تاریخ 08 ستمبر, 2026
رانا ثنا اللہ نے ایک ٹی وی انٹرویو میں کہا کہ جنوبی پنجاب اور بہاولپور کے حوالے سے قراردادیں 10 سال پہلے منظور کی گئی تھیں، اب وہ بے کار ہو چکی ہیں۔
انہوں نے کہا کہ کسی اسمبلی کی میعاد کے اندر کسی قرارداد پر عمل نہ ہو سکے تو پھر یہ اگلی اسمبلی پر منحصر ہے کہ وہ اس بارے میں نئی قرارداد منظور کرتی ہے یا نہیں۔
اسلام آباد صوبے کے سوال پر رانا ثنا اللہ نے جواب دیا کہ الیکشن کمیشن حکومت کو آخری وارننگ دے چکا ہے کہ اسلام آباد میں بلدیاتی انتخابات اس بلدیاتی ایکٹ کے مطابق کرائے جائیں جو منظور کیا جا چکا ہے۔
صوبوں کی بحث پر وزیراعظم کے مشیر سیاسی امور کا کہنا تھا کہ اس پر مسلم لیگ ن یا تو خاموش ہے یا اس بحث کا حصہ نہیں بننا چاہتی، اس پر بحث پارلیمنٹ میں ہی ہونی چاہیے جو اس بحث کی اصل جگہ ہے۔
رانا ثنا اللہ نے مزید کہا کہ وزیراعظم نے محسن نقوی کی زباں بندی نہیں کی، وہ جو چاہیں کہہ سکتے ہیں مگر عوامی ریفرنڈم ہونا ہے تو پارلیمنٹ کی منظوری سے آئین کے مطابق ہونا ہے ، کسی وزیر کے بیان کے مطابق نہیں ہونا۔
