امیر بالاج ٹیپو قتل کیس میں مطلوب ملزم طیفی بٹ کو اشتہاری ملزم قرار دیا گیا تھا جس کی گرفتاری کے لیے پولیس نے گزشتہ سال وزارت داخلہ سے رابطہ کیا۔

وزارت داخلہ کی منظوری کے بعد طیفی بٹ کے ریڈ وارنٹ حاصل کیے گئے جس کی بنیاد پر اس کی گرفتاری کیلیے انٹرپول سے رابطہ کیا گیا تھا۔

تازہ ترین اطلاعات کے مطابق پنجاب پولیس کی ٹیم نے ملزم کو انٹرپول کی مدد سے گرفتار کیا
خواجہ تعریف گلشن عرف طیفی بٹ کو جلد پاکستان منتقل کیا جائے گا۔

واضح رہے کہ بالاج ٹیپو قتل کیس میں دو روز قبل جے آئی ٹی نے خواجہ عقین عرف گوگی بٹ کو قصور وار قرار دیا تھا۔

جے آئی ٹی کی رپورٹ میں کہا گیا کہ گوگی بٹ نے امیر بالاج کے قتل کی منصوبہ بندی کی اور اس سلسلے میں مرکزی ملزم طیفی بٹ کے ساتھ مسلسل رابطے میں رہا۔

ذرائع کا کہنا ہے کہ گوگی بٹ ماضی میں بھی ٹیپو خاندان کے قتل کیسز میں نامزد رہا ہے، جبکہ امیر بالاج کے قتل کے بعد وہ موقع واردات سے فرار ہوگیا تھا۔

یاد رہے امیر بالاج ٹیپو ٹھوکر نیاز بیگ کے قریب ایک نجی ہاؤسنگ سوسائٹی میں سابق ڈی ایس پی اکبر اقبال کے بیٹے کی شادی کی تقریب میں شریک تھا، شادی کی تقریب کے دوران وہاں موجود ایک حملہ آور نے فائرنگ کردی جس سے امیر بالاج ٹیپو سمیت تین افراد زخمی ہوگئے جنہیں اسپتال منتقل کیا گیا تاہم زخموں کی تاب نہ لاتے ہوئے دم توڑ گیا تھا۔

بعد ازاں قتل کیس میں اس کا دوست احسن شاہ ملوث نکلا تھا، پولیس نے احسن سمیت 2 ملزمان کو گرفتار کرلیا تھا۔