تفصیلات کے مطابق پی سی بی نے کورونا ایس او پیز کی خلاف ورزی کرنے والے 3کرکٹرز کی سرزنش کی ہے ان کرکٹرز میں بابر اعظم، امام الحق اور نسیم شاہ شامل ہیں۔ قومی ٹیم کے کپتان بابر اعظم کے ساتھ امام الحق اور نسیم شاہ بھی چند روز قبل ایل سی سی اے گراؤنڈ میں واقع عبدالقادر اکیڈمی میں پریکٹس کرتے پائے گئے تھے،بابر اعظم و دیگر کی ویڈیو سامنے آنے کے بعد کھلاڑیوں کو شدید تنقید کا نشانہ بنایا گیا ۔ ان کھلاڑیوں نے پی سی بی کی طرف سے جاری کردہ ایس او پیز کی دھجیاں اڑا کر رکھ دی تھیں اور ایل سی سی اے گراؤنڈ میں پریکٹس کررہے تھے https://twitter.com/MeUsmanButt/status/1270423304231321601 خیال رہے کہ نیشنل کرکٹ اکیڈمی اور قذافی اسٹیڈیم میں مناسب حفاظتی انتظامات ممکن نہ ہونے کی وجہ سے دورئہ انگلینڈ کیلیے تربیتی کیمپ نہیں لگایا جا رہا، اور کھلاڑیوں کو سخت احتیاطی تدابیر اختیار کرنے کی تلقین کی جارہی ہے، پی سی بی کے دفاتر بھی بند ہیں۔ پی سی بی نے تینوں کرکٹرز کو وارننگ دیتے ہوئے ہدایت کی کہ صرف گھر پر ہی ٹریننگ کا سلسلہ جاری رکھیں، آئندہ کسی میدان میں بیٹنگ یا باؤلنگ پریکٹس کا خطرہ مول نہ لیں۔ پی سی بی کے ترجمان نے تصدیق کرتے ہوئے کہا کہ ایس او پیز پر عملدرآمد کے حوالے سے پی سی بی نے اپنی پالیسی اس پریس ریلیز میں ہی جاری کر دی تھی جس میں قومی ٹیم کا پاکستان میں تربیتی کیمپ نہ لگانے کا اعلان کیا گیا۔ پاکستان کرکٹ بورڈ نے اعلامیہ میں تمام کرکٹرز کو خبردار کیا تھا کہ وہ موجودہ حالات میں کرکٹ گراؤنڈز میں ٹریننگ نہ کریں، سماجی فاصلوں کے پروٹوکولز پر سختی سے عملدرآمد کریں، یہ ہدایات ان کے اورفیملی کی بہتری کیلیے ہی ہیں۔