یونیورسٹی روڈ، نارتھ ناظم آباد اور نارتھ کراچی میں لگنے والے بازاروں میں خریداروں کا ہجومپولیس نے چند بازار بندکرادیے، بچے فاقہ کشی کاشکارہوجائیں گے، خواتین دکاندار کراچی: عوامی اجتماعات پر پابندی کے باوجود شہر میں اتوار بازار لگے رہے ، پولیس نے کچھ بازار بند کرادیے تاہم شہر میں مختلف مقامات پر بازار کھلے رہے۔ تفصیلات کے مطابق کمشنر کراچی کے احکامات کی کھلم کھلا خلاف ورزی جاری ہے، یونیورسٹی روڈ ، ضلع وسطی میں ناظم آباد سمیت شہر کے مختلف مقامات پر اتوار بازار لگا دیے گئے۔کمشنر کراچی کے نوٹی فکیشن کے مطابق عوامی مقامات پر اجتماعات اور بازاروں کے این او سی معطل کردیے گئے تھے، اس کے باوجود شہر میں اتوار بازار کھلے رہے ۔ کورونا وائرس کے پھیلاؤ کے خدشے کے تحت اجتماعات پر پابندی عائد کی گئی ہے۔ اس کے باوجود ان بازاروں کے لگنے پر انتظامیہ اور پولیس خاموش ہے اور بازار میں لوگوں کا جم غفیر خریداری کرنے میں مصروف ہے ۔ ضلع وسطی میں سخی حسن اور یو پی موڑ نارتھ کراچی میں اتوار بازار کھلے رہے جبکہ سرجانی میں اتوار بازار بند کرا دیا گیا۔ پولیس نے کچھ بازاروں کی انتظامیہ کو بازار بند کرنے کی ہدایت کی ہے جس پر کچھ دکانداروں نے احتجاج بھی کیا ہے ۔ اتوار بازار میں اسٹالوں پر اشیا فروخت کرنے والی خواتین نے اپیل کی ہے کہ حکومت پابندی ہٹائے یا انہیں متبادل روزگار فراہم کرے ۔ ایک خاتون کا کہنا تھا کہ یہاں اسٹال لگانے والی خواتین اپنے گھروں کی واحد کفیل یا بیوہ ہیں۔ خواتین کا کہنا تھا کہ بازار بند ہونے سے وہ بے روزگار اور بچے فاقہ کشی کا شکار ہو جائیں گے ، حکومت یومیہ مزدوری کرنے والی مجبور اور غریب خواتین کے لیے امداد کا انتظام کرے۔