چٹاگانگ: پاکستان اور بنگلادیش کے پہلے ٹیسٹ کے دوران اسٹیڈیم کے باہر آگ لگنے کا واقعہ سامنے آیا ہے ۔ دوھوئیں کے بادل   گراؤنڈ میں داخل ہوگئے ۔ بنگلادیشی میڈیا کے مطابق چٹاگانگ کے چوہدری ظہور احمد اسٹیڈیم سے ایک کلو میٹر دور واقع فیکٹری میں آگ لگ گئی جس کا دھواں اسٹیڈیم کی طرف بھی آتا دکھائی دیا۔ مقامی میڈیا کا کہنا ہےکہ آگ بجھانے کا عمل جاری ہے اورتاحال  آتشزدگی میں کسی بڑے نقصان کی اطلاع نہیں ملی ہے ، آتشزدگی کے نتیجے میں دھواں اسٹیڈیم تک آنے سے کھیل متاثر نہیں ہوا اور انتظامیہ نے کھیل کو جاری رکھا  ،  خیال رہے کہ اس سے قبل آج صبح  بنگلادیش کے دارالحکومت ڈھاکا، چٹاگانگ اور دیگر شہروں میں زلزلے کے شدید جھٹکے محسوس کئے گئے ۔ امریکی جیولوجیکل سروے کے مطابق  زلزلے کی شدت ریکٹر اسکیل پر چھ اعشاریہ ایک ریکارڈ کی گئی ۔