پاکستان اور بھارت کے مابین کھیلے گئے سیمی فائنل میں سعید اجمل کے ہاتھوں سچن ٹنڈولکر کے ایل بی ڈبلیو آؤٹ ہونے اور ریویو لینے پر تھرڈ امپائر کی طرف سے ناٹ آؤٹ دینے کے ناقابل فہم فیصلے کو آج بھی کوئی بھول نہیں پایا۔ روائتی حریف پاکستان اور بھارت کے مابین کھیلے گئے ورلڈ کپ سیمی فائنل کو دس برس کا عرصہ بیت گیا ہے مگر یہ معاملہ آج بھی حل طلب ہے۔ ٹنڈولکر کو آؤٹ قرار دینے والے فیلڈ امپائر ایئن گولڈ کہہ چکے ہیں کہ وہ اپنے فیصلے پر آج بھی قائم ہیں اور انہیں حیرت ہے کہ سچن ٹنڈولکر کو ناٹ آؤٹ کیسے قرار دیا گیا۔ برطانیہ کے معروف کمنٹیٹر مارک نکولس نے اس فیصلے پر تبصرہ کرتے ہوئے کہا تھا کہ یہ فیصلہ سمجھ سے بالاتر ہے کہ کیسے گیند وکٹ کو مس کر گئی۔ دوسری جانب قومی ٹیم کے سابق بولر سعید اجمل نے کہا کہ نان اسٹرائیکنگ اینڈ پر موجود گوتم گھمبیر نے سچن ٹنڈولکر کو یہی مشورہ دیا تھا کہ وہ آؤٹ ہیں رویو مت لیں مگر ٹنڈولکر نے ہچکچاتے ہوئے رویو لے لیا۔ انہوں نے کہا کہ رویو کے لیے جو وقت لیا گیا اس سے بھی یہ فیصلہ مشکوک ہو گیا تھا۔ ان کا کہنا تھا کہ آج بھی جب میں دوبارہ اس کلپ کو دیکھتا ہوں تو سچن ٹنڈولکر مجھے 100 فیصد آؤٹ دکھتے ہیں۔ بھارت کے سابق کرکٹر آکاش چوپڑا نے اس فیصلے پر تبصرہ کرتے ہوئے کہا کہ جب میں نے ٹنڈولکر کے پیڈ پر گیند لگتے دیکھا تو میں نے سر پکڑ لیا کیونکہ مجھے ایسا ہی محسوس ہوا کہ یہ تو آؤٹ ہے۔ انہوں نے کہا کہ میں حیران رہ گیا جب رویو لینے پر سچن ٹنڈولکر کو ناٹ آؤٹ قرار دیا گیا۔