ویسٹ انڈیز کرکٹ ٹیم کےآل راؤنڈر ڈیوائن براوو نے  انٹرنیشنل کرکٹ سے ریٹائرمنٹ کا اعلان کردیا۔ تفصیلات  کے مطابق ورلڈ ٹی 20 کپ میں سری لنکا کے خلاف شکست کے بعد دفاعی چیمپئن ویسٹ انڈیز ٹورنامنٹ سے باہر ہو گئی ۔ میچ کے بعد ویسٹ انڈین آل راؤنڈر  ڈی جے براوو نے اعلان کیا کہ اب کرکٹ سے الوداع کا  وقت آ گیا ہے ،  میرا 18 سال پر محیط کرکٹ کیریئر بہترین رہا، اس میں اُتار چڑھاؤ  ضرور آئے تاہم اگر میں پیچھے مڑ کر دیکھتا ہوں تو میں اتنے عرصے تک  کیریبین عوام کی نمائندگی کرنے کا بہت مشکور ہوں۔ ڈی جے  براوو کا کہنا تھا کہ کپتان ڈیرن سیمی کی قیادت میں ہم نے دو مرتبہ ٹی ٹوئنٹی ورلڈ کپ جیتے ہیں ،  ہمارے دور کے تمام کرکٹرز نے ہر جگہ اپنا نام بنایا جس پر مجھے فخر ہے۔ ٹی ٹوئنٹی ورلڈ کپ سے باہر ہونے پر انہوں نے افسوس کا اظہار کرتے ہوئے کہا کہ ہم نے ایسا بالکل بھی نہیں سوچا تھا، بطور کرکٹر ایسے ورلڈ کپ کی توقع نہیں تھی۔ خیال رہے کہ 38 سالہ براوو نے 90 ٹی ٹوئنٹی انٹرنیشنل میں ویسٹ انڈیز کی نمائندگی کی ہے  اور ایک ہزار245  رنز بنائے جبکہ 78 وکٹیں بھی حاصل کیں۔ براوو  2012 اور 2016  میں ٹی ٹوئنٹی ورلڈ کپ جیتنے والی   ٹیم کا حصہ رہے ۔   واضح رہے کہ ٹی ٹوئنٹی ورلڈکپ میں ویسٹ انڈیز نے 4 میچز میں صرف ایک میچ میں کامیابی حاصل کی اور ایونٹ میں سیمی فائنل کی دوڑ سے باہر ہوگیا، البتہ ویسٹ انڈیز نے اپنا آخری گروپ میچ آسٹریلیا کے خلاف 6 نومبر کو کھیلنا ہے جو کہ ڈیوائن براوو کا آخری میچ بھی ہوگا ۔  آئی سی سی کی جانب سے بھی ڈیوائن براوو کوخراج تحسین  پیش کیا گیا ہے ۔  https://twitter.com/ICC/status/1456456271633305601?ref_src=twsrc%5Etfw%7Ctwcamp%5Etweetembed%7Ctwterm%5E1456456271633305601%7Ctwgr%5E%7Ctwcon%5Es1_&ref_url=https%3A%2F%2Fgnnhd.tv%2Furdu%2Fnews%2F8451