وزیراعظم عمران خان آج 16 ستمبر کو دو روزہ سرکاری دورے پر تاجکستان روانہ ہوں گے جس میں اعلیٰ سطح کا وفد بھی وزیراعظم کے ہمراہ ہوگا۔ ترجمان دفتر خارجہ کے مطابق وزیراعظم شنگھائی تعاون تنظیم کے سربراہ سمٹ میں شریک ہوں گے، جب کہ تاجکستان بزنس فورم کے پہلے اجلاس کا بھی افتتاح کریں گے۔ وزیراعظم تاجک صدر امام علی رحمانوف سے ملاقات کریں گے، جب کہ دیگر ممالک کے سربراہان سے بھی ملاقاتیں کریں گے۔ دورے کے دوران تجارت، معاشی و سرمایہ کاری خاص طور پر علاقائی روابط کے فروغ پر بات چیت ہوگی۔ واضح رہے کہ وزیراعظم کا وسطی ایشیاء کا یہ تیسرا دورہ ہے۔ وزیراعظم تاجک صدر کی دعوت پر تاجکستان کا سرکاری دورہ کر رہے ہیں۔