لاہور: مسلم لیگ  (ن) کے صدر اور قائد حزب اختلاف شہبازشریف نے وزیراعظم سے  پیٹرولیم مصنوعات   کی قیمت  میں اضافہ واپس لینے اور گھر جانے کا مطالبہ  کردیا۔ تفصیلات کے مطا بق پاکستان مسلم لیگ (ن) کے صدر اور قائد حزب اختلاف شہباز شریف نے ایک بیان میں کہا کہ  پیٹرول بم گرانےکے بعداب بجلی 6 روپے سے زائد مہنگی کی جارہی ہے ، عوام  کو ’مہنگا ترین وزیراعظم‘ قبول نہیں لہٰذا عمران نیازی گھر جائیں ۔ ان کا کہنا تھا کہ عمران نیازی پٹرول، بجلی کی قیمتوں میں اضافہ واپس لیں، عوام کی مزید بددعائیں نہ لیں، خدا کا خوف کریں۔پہلے ہی  پٹرول کی قیمت میں ظالمانہ اضافے سے  آٹا ، چینی ، کرائے کی قیمت کو آگ لگ چکی ہے ، پیٹرولیم ڈویلپمنٹ لیوی میں 4 روپے اضافہ عوام پر ایک اور ظلم ہے۔ شہباز شریف کا کہنا تھا کہ حکومت آئی ایم ایف کے مفاد میں قانون سازی کرلیتی ہے، حکومت عوام کے ریلیف کے لیے دو تہائی کا جھوٹ گھڑ لیتی ہے، عمران نیازی اتحادیوں کو وزارتوں کاریلیف دے سکتے ہیں لیکن ان کے پاس عوام کو ریلیف دینے کے لیے کچھ نہیں۔ انہوں نے کہا کہ رواں مالی سال کے سات ماہ میں خام تیل اور آئل امپورٹ بل  11.7 ارب ڈالر کی ریکارڈ سطح پر پہنچنا تباہی کا تسلسل ہے ، انرجی امپورٹس میں 125 فیصد کا ہوشربا اضافہ باعث تشویش ہے ۔  شہباز شریف نے کہا کہ کاروباری برادری پریشان ، عوام بے حال اور حکمران حالت انکار میں ہیں ، حکومت کو عالمی منڈی میں صرف اضافہ نظر آتا ہے، کمی نظر نہیں آتی ، عوام کو ریلیف تو نہ مل سکا، پونے چار سال سے حکومت صرف بہانے اور پیسے بنارہی ہے ۔ ان کاکہنا تھا کہ  حکومت عوام کو ریلیف دینے کی نہ نیت رکھتی ہے نہ اہلیت، اس سے نجات سے ہی عوام کو ریلیف مل سکتا ہے ۔  قائد حزب اختلاف نے کہا کہ ملک اور عوام کا معاشی دیوالیہ اور حکمرانوں کی آمدن میں اضافہ ہوچکا ہے، حکمران مہنگائی کو قابو کرنے کے بجائے مخالفین اور ناقدین کو قابو کرنے میں مصروف ہے جو افسوسناک ہے ۔  عوام کا چولہا نہیں جل رہا بلکہ ان کا دل جل رہا ہے، عوام کی سانس بند کرنے والے اقتدار میں رہنے کا حق کھو چکے ہیں ۔ انہوں نے مزید کہا کہ  عوام صرف اور صرف عمران نیازی سے نجات چاہتی ہے، عوام کی خواہشات کو ہم پورا کریں گے۔