اسلام آباد: صدرِ مملکت عارف علوی کا کہنا ہے کہ آرمی چیف کے بارے میں وزیراعظم میاں شہباز شریف کے مشورے پر عمل کرینگے۔ ذرائع کے مطابق صدر مملکت عارف علوی نے قریبی دوستوں سے گفتگو کی جس میں انہوں نے آرمی چیف کی تعیناتی کے حوالے سے بات کی۔ صدر مملکت نے کہا کہ آرمی چیف کے بارے میں وزیراعظم کا مشورہ آیا تو اُس پر عمل کرینگے۔انہوں نے دوستوں سے گفتگو میں کہا کہ میرے پاس وزیراعظم کے مشورے کو روکنے کا قانونی اختیار نہیں ہے اسی لئے مملکت کے معاملات میں کبھی رخنہ نہیں ڈالا۔ قبل ازیں صدر مملکت ڈاکٹر عارف علوی سے وزیر خزانہ سینیٹر اسحاق ڈار نے ملاقات کی جس میں مختلف سیاسی و مالی امور پر تبادلہ خیال کیا گیا۔ ایوانِ صدر کی جانب سے جاری کیے گئے اعلامیے کے مطابق وزیر خزانہ نے ملاقات میں صدر مملکت کو ملکی معاشی اور مالی صورتحال پر بریفنگ دی۔ اعلامیے میں بتایا گیا ہے کہ صدر مملکت کو سیلاب سے متاثرہ علاقوں اور متاثرین کی بحالی کے حوالے سے بھی بریفنگ دی گئی۔ ذرائع کے مطابق ملاقات میں سیاسی معاملات کو افہام و تفہیم سے حل کرنے پر تبادلہ خیال ہوا جبکہ وفاقی وزیر خزانہ نے وزیراعظم شہباز شریف کا اہم پیغام بھی صدر مملکت کو پہنچایا۔ اسحاق ڈار نے پیغام دیا کہ صدر مملکت باہمی احترام اور سیاسی اعتدال کے لیے کردار ادا کریں، آئینی و قانونی امور پر ڈیڈلاک نہیں ہونا چاہیے۔