امریکا نے فوجی تربیتی اور تعلیمی پروگرام میں پاکستان فوج کے افسران کی شمولیت بحال کرنے کی منظوری دے دی، صدر ڈونلڈ ٹرمپ نے انٹرنیشنل ملٹری ایجوکیشن اینڈ ٹریننگ پروگرام میں پاک فوج کے افسران کی شمولیت پر 2 سال پہلے پابندی لگائی تھی۔ غیر ملکی خبر رساں ادارے کے مطابق امریکی محکمہ خارجہ کی ترجمان نے ایک ای میل میں کہا ہے کہ پاکستان کے لیے امریکی فوجی تربیتی پروگرام میں شمولیت کی بحالی کا مقصد دونوں ملکوں کے درمیان دو طرفہ تعاون کا فروغ اور مشترکہ ترجیحات کو ایک موقع فراہم کرنا ہے۔ترجمان نے کہا کہ امریکا ٹھوس اقدامات کے ذریعے ایسی بنیاد رکھنا چاہتا ہے جس سے خطے کی سیکیورٹی اور استحکام کو مزید بہتر بنایا جاسکے۔ امریکی فوجی تربیتی پروگرام میں پاکستان کی شمولیت کی بحالی کا فیصلہ ایسے موقع پر سامنے آیا ہے کہ جب رواں سال امریکا کے صدر ڈونلڈ ٹرمپ اور پاکستان کے وزیرِ اعظم عمران خان کے درمیان دو ملاقاتیں ہو چکی ہیں۔واضح رہے کہ پاکستان کے لیے فوجی تربیتی پروگرام میں شرکت کی بحالی کانگریس کی منظوری سے مشروط ہے۔ دوسری جانب امریکی سینیٹ اور ایوان نمائندگان کی متعلقہ کمیٹیوں کے ری پبلکن اور ڈیموکریٹک ارکان نے فوری طور پر امریکی حکومت کے اس فیصلے پر بیان نہیں دیا ہے۔