قاہرہ(این این آئی)گذشتہ چند روز کے دوران عالمی میڈیا میں اس طرح کی معلومات گردش میں آئی ہیں کہ القاعدہ تنظیم کے سربراہ ایمن الظواہری ایک خطرناک بیماری میں مبتلا ہیں جس کے نتیجے میں ان کی صحت بڑی حد تک بگڑ چکی ہے ۔ مغربی میڈیا نے انسداد دہشت گردی کی عالمی کوششوں میں شریک ایک سینئر بین الاقوامی ذمہ دار کے حوالے سے بتایا کہ الظواہری کو دل کے حوالے سے پیچیدہ مشکلات کا سامنا ہے جبکہ عرب ٹی وی سے بات چیت میں مذہبی سیاسی تنظیموں کے امور کے محقق احمد عطا نے کہاکہ زیر گردش رپورٹوں سے معلوم ہوتا ہے کہ الظواہری جگر کے سرطان میں مبتلا ہیں اور مرض اس مرحلے تک آ چکا ہے کہ اب جگر کی تبدیلی کے سوا کوئی چارہ نہیں، الظواہری کو دنیا کے کسی بھی ہسپتال میں کس طرح منتقل کیا جا سکتا ہے ؟۔