یونان میں آگ بجھانے والے ہیلی کاپٹروں کا فضائی تصادم، 2 اہلکار ہلاک
شائع شدہ تاریخ 03 اگست, 2026
غیر ملکی خبر رساں ادارے کے مطابق یونان کے دارالحکومت ایتھنز کے مغرب میں واقع پساتھا کے جنگلات میں آگ بجھانے کے دوران فائر ڈپارٹمنٹ کے 2 ہیلی کاپٹر آپس میں ٹکرا گئے۔
ٹی وی فوٹیج میں دیکھا گیا کہ ایک ہیلی کاپٹر دوسرے ہیلی کاپٹر کے نچلے حصے سے ٹکرایا، جس کے بعد وہ دھماکے سے پھٹ کر زمین پر گر گیا۔
میڈیا رپورٹس کے مطابق حادثے میں ایک ڈنمارک کا پائلٹ اور یونان کی فائر سروس کا افسر جاں بحق ہوگئے جبکہ دوسرے ہیلی کاپٹر کے عملے کو بحفاظت بچا لیا گیا۔
فائر سروس کے ڈائریکٹر کمیونیکیشنز نے بتایا کہ عملے کے دونوں افراد کو بے ہوشی کی حالت میں اسپتال منتقل کیا گیا، جہاں ڈاکٹروں نے ان کی موت کی تصدیق کر دی۔
دوسری جانب، سیکڑوں فائر فائٹرز ایتھنز کے مغرب میں لگی آگ کو شہر کے مضافاتی علاقوں تک پہنچنے سے روکنے کی کوششوں میں مصروف ہیں، جبکہ حکام نے تحقیقات مکمل ہونے تک علاقے میں تمام ہیلی کاپٹروں کی پروازیں معطل کر دی ہیں۔
یونانی وزیراعظم کے مطابق حادثے میں جاں بحق ہونے والوں میں ایک یونان اور ایک ڈنمارک کا پائلٹ شامل ہے۔
اس حادثے کے بعد رواں ہفتے یونان میں جنگلات کی آگ سے ہلاکتوں کی مجموعی تعداد 5 ہوگئی، اس سے قبل کریٹ اور پیلوپونیز میں تین فائر فائٹرز جان کی بازی ہار چکے ہیں۔
