اسلام آباد: چین کی موبائل کمپنی نے لائسنس کی تجدید کے لیے پاکستان ٹیلی کمیونیکیشن اتھارٹی (پی ٹی اے) کو 37 ارب 16 کروڑ روپے فیس ادا کردی۔ پی ٹی اے کے ترجمان نے تصدیق کی کہ چائنا موبائل (سی ایم پاک) نے پاکستان ٹیلی کمیونیکیشن اتھارٹی (پی ٹی اے) کولائسنس کی تجدید کی فیس کی مد میں 37 ارب 16 کروڑ روپے (238.6 ملین امریکی ڈالر کے برابر) ادا کردیے۔ پی ٹی اے کے ترجمان کا کہنا ہے کہ ’لائسنس کی تجدید کے حوالے سے ملنے والی رقم فیڈرل کونسولیڈیٹیڈ فنڈ (ایف سی ایف) میں جمع کرادی گئی ہے‘۔ https://twitter.com/PTAofficialpk/status/1202561306353709058 ترجمان پی ٹی اے کے مطابق موبائل فون کمپنیوں کی جانب سے لائسنس تجدید فیسوں کی مد میں حال ہی میں 107 ارب روپے سے زائد رقم ادا کی گئی جو سرکاری خزانے میں جمع کرائی گئی، مذکورہ رقم سے معیشت اور قومی خزانے کو معاونت فراہم ہو گی۔ یاد رہے کہ پاکستان میں کام کرنے والی موبائل کمپنیوں کو پی ٹی اے کی جانب سے لائسنس جاری کیا گیا ہے جس کی تجدید انہیں ہر سال فیس ادا کر کے کرانا ہوتی ہے۔