اسلام  آباد : وزیر اعظم عمران خان 3 سے 6 فروری تک چین کا دورہ کریں گے ،  چینی قیادت کی خصوصی دعوت پر وزیراعظم سرمائی اولمپک گیمز کی افتتاحی تقریب میں شرکت  کریں گے ۔  ترجمان دفتر خارجہ کی جانب سے جاری بیان کے مطابق  وزیراعظم کے ہمراہ کابینہ کے ارکان اور اعلیٰ سرکاری افسران سمیت اعلیٰ سطح کا وفد بھی ہوگا ۔ دورے کے دوران وزیراعظم چینی حکام کے ساتھ دوطرفہ ملاقاتیں کریں گے ۔  صدر شی جن پنگ اور  وزیر اعظم لی کی چیانگ سے ملاقاتوں میں  رہنما دو طرفہ تعلقات کے تمام پہلوؤں کا جائزہ لیں گے۔  ترجمان وزارت خارجہ کا کہنا ہے کہ وزیر اعظم عمران خان دورے میں  ملاقاتوں میں سی پیک، تجارتی اور اقتصادی تعاون مضبوط بنانے پر توجہ دی جائے گی۔ملاقاتوں میں اہم علاقائی اور بین الاقوامی امور پر بھی تبادلہ خیال ہوگا ۔ دورے سے متعدد شعبوں میں تعاون کو مزید تقویت دے گا۔  خیال رہے کہ ایک عالمی ایونٹ کے طور پر، اولمپک گیمز دنیا کے لوگوں کے درمیان باہمی افہام و تفہیم، شمولیت اور دوستی کو فروغ دیتے ہیں  ۔  بیجنگ جلد ہی اولمپک گیمز کے موسم گرما اور سرما ایڈیشن کی میزبانی کرنے والا پہلا شہر بنے گا ، چینی حکومت نے کورونا کے باوجود سرمائی اولمپک گیمز کے انعقاد کے لیے قابل تعریف انتظامات کیے ہیں ۔  ترجمان وزارت خارجہ کے مطابق وزیر اعظم کا دورہ پاک چین سفارتی تعلقات کی 70 ویں سالگرہ کی تقریبات کا اختتام ہوگا، دورہ چین میں متعدد ایم او یوز اور معاہدوں پر بھی دستخط ہوں گے ۔ وزیر اعظم کا دورہ پاکستان اور چین کے درمیان مضبوط شراکت داری کو نئی بلندیوں تک لے جانے کے لیے تجدید عہد ہوگا ۔ بیجنگ میں وزیراعظم چین کے ممتاز کاروباری رہنماؤں اور چین کے سرکردہ تھنک ٹینکس، تعلیمی اداروں اور میڈیا کے نمائندوں سے بھی ملاقات کریں گے۔