اسلام آباد /  لندن: مسلم لیگ (ن) کے قائد میاں نواز شریف نے وزیراعظم شہباز شریف کو عمران خان سے کسی بھی قسم کے مذاکرات سے روک دیا اور کہا ہے کہ اس فتنے کا نہ کوئی مطالبہ مانا جائے اور نہ فیس سیونگ دی جائے۔ ایکسپریس نیوز کے مطابق مسلم لیگ (ن) کے سربراہ نواز شریف نے وزیراعظم شہباز شریف کو تحریک انصاف کے چیئرمین عمران خان سے کسی بھی قسم کے مذاکرات کرنے یا مطالبہ تسلیم کرنے سے منع کردیا ہے اور انہیں ہدایت دی ہے کہ ایسا کوئی کام نہ کیا جائے کہ جس سے عمران خان کو لانگ مارچ میں فیس سیونگ ملے۔ https://twitter.com/NawazSharifMNS/status/1587099235459145728 اپنے ٹویٹ میں نواز شریف نے کہا ہے کہ لانگ مارچ میں 10 لاکھ افراد لانے کا دعویٰ کرنے والا ابھی تک دو ہزار بندے جمع نہیں کرسکا، عوام کی لاتعلقی کی وجہ وہ شرانگیز جھوٹ ہیں جن کا کچا چٹھا قوم کے سامنے آ چکا ہے۔ https://twitter.com/NawazSharifMNS/status/1587099237678026760 نواز شریف نے کہا کہ عمران خان نے ایک کے بعد ایک جھوٹ اتنی بے دردی اور ڈھٹائی سے بولا کہ ڈی جی آئی ایس آئی کو مجبوراً اپنی خاموشی توڑ کر قوم کو سچ بتانا پڑا جس کا جواب یہ اتنے دن گزرنے کے بعد بھی نہیں دے سکا اسی لیے عمران خان کا سارا زور حسبِ عادت صرف گالی گلوچ تک محدود ہے۔ https://twitter.com/NawazSharifMNS/status/1587099239766790145 ن لیگی قائد نے مزید کہا کہ  میں نے شہباز شریف سے کہہ دیا ہے کہ یہ دو ہزار افراد کا جتھہ لے کر آئے یا 20 ہزار افراد کا ، نہ اس فتنے کا کوئی مطالبہ سننا ہے اور نہ ہی اسے کوئی فیس سیونگ دینی ہے جس کے لیے یہ بیتاب ہے، وزیر اعظم کو اپنی تمام تر توجہ عوامی خدمت پر مرکوز رکھنی چاہیے۔