کیلیفورنیا: عالمی ٹیکنالوجی ادارہ میٹا نے پاکستان کے سیلاب متاثرین کے لیے ساڑھے 12 کروڑ روپے عطیہ کرنے کا اعلان کردیا۔ غیر ملکی خبر رساں ایجنسی کے مطابق میٹا نے پاکستان کے سیلاب زدگان کے لیے عطیہ کا اعلان کرتے ہوئے کہا کہ امداد چاروں صوبوں میں یونیسیف، ہینڈز اور آئی ٹی اے کو فراہم کی جائے گی۔ میٹا ڈائریکٹر فار ایمرجنگ مارکیٹس جارڈی فورنیز نے کہا کہ پاکستان کو انتہائی تباہ کن قدرتی آفت کا سامنا ہے اور ہم بحالی کے لیے سیلاب متاثرین کے ساتھ شانہ بشانہ کھڑے ہیں۔ یونیسیف کے مطابق پاکستان میں آزمائش کے اس موقع پر ہم میٹا کے تعاون کے مشکور ہیں۔ دوسری جانب امریکی محکمہ خارجہ کے ترجمان نیڈ پرائس نے میڈیا بریفنگ میں کہا ہے کہ پاکستان کوایف 16 پرزوں کی فروخت کے بارے میں کانگریس کو آگاہ کردیا ہے۔ پرزوں کی فروخت سے دہشتگردی کے خلاف جنگ میں مدد ملے گی۔ ترجمان نے مزید کہا کہ پاکستان کئی شعبوں میں امریکا کا اہم اتحادی ہے۔ سیلاب سے جانی اور مالی نقصان پر افسوس ہے۔ مشکل کی اس گھڑی میں پاکستانی عوام کے ساتھ ہیں۔