لائبریری میٹروپول کے قریب فٹ پاتھ پر بنائی گئی ،مطالعہ کے فروغ سے سماجی ترقی کی کوششیں مو ثر ہوں گی،دیگر شہروں میں بھی لائبریریاں بنائیں گے ،چیف سیکریٹری انتظامیہ کراچی کو خوبصورت بنانے اور مطالعہ کا کلچر پیدا کر نے کے لئے کتابوں کے حصول کو آسان بنانے کے اقدامات کر رہی ہے ،کمشنر افتخار شالوانی کا اظہار خیال کراچی : چیف سیکریٹری سندھ ممتازعلی شاہ نے کمشنر کراچی افتخار شالوانی کے ہمراہ ملک کی پہلی اسٹریٹ لائبریری کا افتتاح کیا ۔ میٹروپول ہوٹل کے قریب فٹ پاتھ پر بنائی جانے والی لائبریری کی افتتاحی تقریب میں ڈائریکٹر جنر ل کے ڈی اے ڈاکٹر سیف الرحمان سینئر بیورو کریٹ طارق مصطفی ، ڈپٹی کمشنر جنوبی سید صلاح الدین احمد، غازی صلاح الدین، منیزہ شمسی،دیگر مصنفین سمیت کمشنر کراچی لٹریری سرکل کے ارکان اسسٹنٹ کمشنر سارہ جاوید اور دیگر بھی موجو د تھے ۔ چیف سیکریٹری ممتاز علی شاہ نے کہا کہ اسٹریٹ لائبریری کا قیام ایک اچھی کوشش ہے اس سے مطالعہ کے کلچر کو فروغ ملے گا۔ انہوں نے کہا کہ مطالعہ کے فروغ سے سماجی ترقی کی کوششیں مو ثر ہوں گی، مطالعہ کے کلچر کو فروغ دینے اور لائبریریوں کو بحال کر نے کی کمشنر کی کوششیں قابل تحسین ہیں۔ انہوں نے کہا کہ صوبہ کے دیگر شہروں میں بھی اسٹریٹ لائبریریاں قائم کی جائیں گی ۔ انہوں نے حیدرآباد اور سکھر سمیت دیگر شہروں میں لائبریریاں قائم کر نے کا اعلان کیا ۔کمشنر افتخا ر شالوانی نے کہا انتظامیہ کراچی کو خوبصورت بنانے کے لئے اور مطالعہ کا کلچر پیدا کر نے کے لئے کتابوں کے حصول کو آسان بنانے کے لئے اقدامات کر رہی ہے ۔انہوں نے کہاکہ شہر کے دیگر چھ اضلاع میں بھی اسٹریٹ لائبریریاں قائم کی جائیں گی۔ انہوں نے کہا کہ اس سلسلہ میں تمام ڈپٹی کمشنرز کو ہدایات جاری کر دی گئی ہیں۔ انہوں نے کہا کہ شہر کو خوبصورت بنانے اور لائبریریوں کی بحالی کے کام میں وزیر اعلیٰ سندھ نے ان کی بھر پور حو صلہ افزائی کی ہے۔ انہوں نے کہا کہ وزیر اعلیٰ سندھ چاہتے ہیں کہ لوگوں کو کتابوں کی طرف راغب کیا جائے۔ انہو ں نے کہا کہ اسٹریٹ لائبریری کا قیام قائد اعظم محمد علی جناح کی سالگرہ کے موقع پر شہریوں کے لئے ایک تحفہ ہے ۔اس موقع پر موجود افراد نے لائبریری کے قیام کو خوش آئند قرار دیتے ہوئے کہا کہ اسمارٹ موبائل فونز اور انٹرنیٹ سے مضبوط رابطے نے نوجوانوں کا کتابوں کے مطالعے سے رشتہ کمزور کر دیا ہے اور اب بظاہر انہیں کتاب کی جانب راغب کرنا آسان نہیں۔ تاہم شہر کراچی میں اپنی نوعیت کی پہلی اور منفرد اسٹریٹ لائبریری کی بنیاد رکھ کر لوگوں میں مطالعے کا شوق جگانے کی ایک کوشش کی گئی ہے۔