مریخ پر اربوں سال پرانا دریا دریافت، ناسا کی بڑی کامیابی
شائع شدہ تاریخ 31 مارچ, 2026
سائنسدانوں مریخ کی گہرائی میں ایک وسیع قدیم دریا کے نظام کو دریافت کرلیا، یہ دریافت ناسا کے مشن کے تحت بھیجے گئے روبوٹ پرسیورنس روور نے کی ہے۔
تحقیق کے مطابق یہ آثار مریخ کے شمالی حصے میں واقع جیزیرو کریٹر میں دریافت ہوئے، جہاں ماہرین کے خیال میں اربوں سال پہلے ایک وسیع جھیل موجود تھی۔
روبوٹ نے زمین کے نیچے موجود تہہ دار ساختوں اور مٹی کے نمونوں کا تجزیہ کیا، جن میں کٹاؤ اور بہاؤ کے ایسے شواہد ملے جو کسی قدیم دریا کے جھیل میں گرنے کی نشاندہی کرتے ہیں۔
سائنسدانوں کا کہنا ہے کہ دریافت ہونے والا یہ ڈیلٹا تقریباً چار ارب سال پرانا ہے اور مریخ کے ابتدائی دور سے تعلق رکھتا ہے۔
ماہرین کے مطابق پانی زندگی کے لیے بنیادی جزو سمجھا جاتا ہے، اس لیے جہاں پانی کے آثار ملیں وہاں ماضی میں زندگی کے امکانات بھی بڑھ جاتے ہیں۔
تحقیق میں یہ بھی انکشاف کیا گیا کہ مریخ کا قدیم ماحول آج کے مقابلے میں زیادہ گرم اور گھنا تھا، جو مائع پانی کے بہاؤ کے لیے موزوں حالات فراہم کرتا تھا۔ ماہرین کے مطابق جیزیرو کریٹر ایسا علاقہ ہوسکتا ہے جہاں ماضی میں زندگی کے آثار محفوظ ہوئے ہوں۔
یاد رہے کہ اس سے قبل بھی اسی روبوٹ کی جانب سے ایک چٹان میں ممکنہ حیاتیاتی نشانات کی نشاندہی کی جا چکی ہے، تاہم اس کی حتمی تصدیق ابھی ہونا باقی ہے۔
سائنسدانوں کا کہنا ہے کہ مریخ کی تاریخ ایک پیچیدہ پہیلی کی مانند ہے اور ہر نئی تحقیق اس کے رازوں سے پردہ اٹھانے میں مدد دے رہی ہے۔
