کراچی: پی ایس ایل سکس کے دوسرے روز لاہور قلندرز کے خلاف پشاور زلمی کی بیٹنگ جاری ہے۔ قلندرز کے باولرز نے میچ کے آغاز پر ہی زلمی بلے بازوں پر کاری وار کئے، شاہین شاہ آفریدی نے پہلی بال پر اوپنر امام الحق کو پویلین کی راہ دکھا دی. کیچ ڈنک نے پکڑا جبکہ زلمی کا مجموعی سکور صفر تھا۔ شعیب ملک کریز پر آئے اور 2 چوکے لگا کر قلندرز کا ادھار چکانے کی کوشش کی تاہم قلندرز کے حملے جاری رہے۔ کامران اکمل محض 5 رنز پر کیچ آوٹ ہوئے تو حیدر علی نے بھی ان کی پیروی کی، صفر سکور پر سلمان مرزا کا شکار بنے۔ قبل ازیں ٹاس کے موقع پر پشاور زلمی کے کپتان وہاب ریاض نےگفتگو کرتے ہوئے کہا کہ لاہور قلندر اچھی ٹیم ہے، اچھا ٹارگٹ دیں گے۔ دوسری جانب لاہور قلندرز کے کپتان سہیل اختر نے کہا کہ وکٹ اچھی لگ رہی ہے، اس لئے بولنگ کا فیصلہ کیا، پشاور زلمی کو150 رنز تک آوٹ کرنے کی کوشش کریں گے۔ نیشنل اسٹیڈیم کراچی میں آج بھی دونوں جانب سے شائقین میں بھرپور جوش و خروش دیکھنے میں آ رہا ہے، متحارب ٹیموں کی جانب سےجیت کے دعووں نے مقابلہ دلچسپ بنا دیا۔