سڈنی : آئی سی سی ٹی ٹوئنٹی ورلڈ کپ میں آج ایک اہم میچ کھیلا جائے گا، گروپ اے کی ٹیمیں انگلینڈ اور سری لنکا  آمنے سامنے ہونگی ۔  تفصیلات کے مطابق گروپ اے میں انگلینڈ اور سری لنکا کی ٹیمیں  سڈنی میں پاکستانی وقت کے مطابق دن 1 بجے  میدان میں اتریں گی ۔ سیمی فائنل میں پہنچنے کیلئے انگلینڈ کو اس میچ میں لازماً فتح حاصل کرنی ہوگی ، سری لنکا کی ٹیم آخری چار ٹیموں میں پہنچنے کی دوڑ سے پہلے ہی باہر ہوچکی ہے۔ یہ مقابلہ انگلینڈ کیلئے اہمیت کا حامل ہے کیونکہ  آج کی  فتح اُس کو سیمی فائنل میں پہنچا سکتی ہے، اس وقت انگلینڈ کے چار میچوں کے بعد پانچ پوائنٹس ہیں۔ انگلینڈ اگر سری لنکا کو آج ہرانے میں کامیاب ہوگیا تو اس گروپ میں اُس کے نیوزی لینڈ اور آسٹریلیا کے ساتھ پوائنٹس کی تعداد 7 ہوجائے گی۔ نیوزی لینڈ کی ٹیم پہلے ہی سیمی فائنل میں پہنچ چکی ہے ، آسٹریلوی ٹیم البتہ رن ریٹ میں انگلینڈ سے پیچھے ہے اگر انگلش ٹیم کو فتح مل گئی تو وہ سیمی فائنل میں جاسکتی ہے۔  دوسری جانب سری لنکن ٹیم کے چار میچوں کے بعد صرف چار پوائنٹس ہیں ، جیتنے پر اُن کے پوائنٹس کی تعدا د 6 ہوجائے گی جو کہ سیمی فائنل تک پہنچنے کے لیے ناکافی ہوں گے لیکن ایسی صورت میں آسٹریلوی ٹیم سیمی فائنل میں پہنچ جائے گی۔ واضح رہے کہ میگا ایونٹ کا پہلا سیمی فائنل میچ 9 نومبرکو سڈنی اور دوسرا سیمی فائنل میچ 10 نومبر کو ایڈیلیڈ میں کھیلا جائے گا جبکہ فائنل میچ 13نومبر کو ایم سی جی میلبورن میں کھیلا جائے گا۔