فیس بک نے بھی اپنے صارفین کیلئے مختصر ویڈیوز کا فیچر متعارف کروادیا۔ فیس بک نے ایک بار پھر اپنی مخالف ایپس کا فیچر کاپی کرکے انہیں پیچھے چھوڑنے کی کوشش کی ہے۔ فیس بک کی موبائل ایپ میں ایک نئے فیچر ’ریلز‘ کا اضافہ کردیا گیا ہے۔ اگر نام سے خیال آتا ہے کہ یہ انسٹاگرام کا فیچر نہیں تو اس کا جواب ہے ہاں، یہ وہی ہے مگر اب آپ ریلز کی مختصر ویڈیوز فیس بک پر بھی دیکھ سکیں گے۔ اس سے قبل فیس بک نے اسنیپ چیٹ کے اسٹوریز فیچر کی نقل کو اصل سے زیادہ مقبول بنا دیا تھا اور اب وہ ’ریلز‘ کے ساتھ بھی یہی امید کررہی ہے۔ انسٹا گرام پر تو ’ریلز‘ کو کچھ زیادہ مقبولیت نہیں ملی مگر فیس بک کو توقع ہے کہ اس کی مین ایپ پر یہ فیچر زیادہ لوگوں کی توجہ حاصل کرسکے گا۔ فیس بک کی جانب سے یہ فیچر سب سے پہلے امریکا میں اینڈرائیڈ اور آئی او ایس صارفین کیلئے متعارف کرایا گیا ہے۔ فیس بک ’ریلز‘ موسیقی، آڈیو، ایفیکٹس اور دیگر پر مشتمل فیچر ہوگا جس کو نیوز فیڈ یا گروپس میں دیکھا جاسکے گا۔ جب صارف ایسی مختصر ویڈیو کو دیکھے گا تو وہ آسانی سے کریٹیئر کو فالو کرسکے گا یا اپنے دوست سے شیئر کرسکے گا۔