اسلام آباد : حکومت کا شہریوں پر ایک اوربجلی بم گرانے کا فیصلہ ، بجلی کی قیمتوں میں 3 روپے 12 پیسے فی یونٹ اضافے کا امکان ہے ۔  جی این این کے مطابق  سی پی پی اے کی بجلی کی قیمتوں میں اضافے کی درخواست پر نیپرا میں کل سماعت ہوگی ،  بجلی کی قیمتوں اضافہ کی درخواست دسمبرکے ماہانہ فیول ایڈجسٹمنٹ کی مد میں دی گئی ہے ۔    درخواست میں کہا گیا ہے کہ دسمبر2021 میں 8 ارب 52 کروڑیونٹ بجلی پیدا ہوئی، بجلی کی پیداوارلاگت 73 ارب 84 کروڑروپے رہی،  22 روپے 24 پیسے میں فرنس آئل سے مہنگی ترین بجلی پیدا کی گئی ، ایل این جی سے 17 روپے 80 پیسے فی یونٹ میں بجلی پیدا ہوئی،14 روپے 8 پیسے فی یونٹ میں ڈیزل سے بجلی پیدا ہوئی۔   درخواست میں یہ بھی کہا گیا ہے کہ  کوئلے سے بجلی کی پیداواری لاگت  13 روپے 31 پیسے فی یونٹ میں ہوئی ،  ایران سے 13 روپے 26 پیسے فی یونٹ میں بجلی درآمد کی گئی ۔  اضافے کی صورت میں صارفین پر30 ارب سے زائد اضافی بوجھ پڑے گا۔