دال چنا کی قیمت 7 روپے کمی کے بعد 160 روپے مقرر، جبکہ مختلف اقسام کے گھی بھی اب 200 روپے کے بجائے 170 روپے فی کلو میسر ہونگے لاہور : یوٹیلیٹی اسٹورزمیں دالوں اورگھی کی قیمتوں میں مزیدکمی کر دی گئی، دال چنا، مسعور اور گھی پانچ سے تیس روپے فی کلو سستا ملے گا۔ تفصیلات کے مطابق وزیراعظم عمران خان کے اعلان کے بعد یوٹیلٹی اسٹورز میں دالوں اور گھی کی قیمتوں میں کمی کردی گئی ہے۔ دال چنا، مسعور اور گھی پانچ سے تیس روپے فی کلو سستا ملے گا۔ اس حوالے سے مشیرخزانہ حفظ شیخ کا کہنا ہے کہ ملک میں اہم غذائی اجناس کی کوئی قلت نہیں، قیمتوں میں کمی کیلئے صوبائی اور ضلعی انتظامیہ کردار ادا کریں۔ بدھ کے روز یوٹیلٹی اسٹور کارپوریشن سے جاری نوٹیفیکیشن میں کہا گیا ہے کہ دال چنا کی قیمت 7 روپے کمی کے بعد 160 روپے مقرر ہو گئی ہے جبکہ دال مسور بھی 135 روپے کے بجائے 130 روپے میں دستیاب ہوگی۔ مختلف اقسام کے گھی بھی اب 200 روپے کے بجائے 170 روپے فی کلو میسر ہونگے۔ ترجمان یوٹیلٹی اسٹور نے بتایا کہ سبسڈائزڈ گھی، آٹا، دالیں، چاول اور چینی وافر مقدار میں دستیاب ہیں۔ یوٹیلٹی اسٹورز پر چینی 68 روپے فی کلو میں دستیاب ہوگی۔ دوسری جانب حفیظ شیخ کی زیرِ صدارت اہم غذائی اشیاء کی فراہمی اور قیمتوں میں استحکام کا جائزہ لیا گیا۔ مشیر خزانہ نے کہا کہ ملک میں اہم غذائی اجناس کی کوئی قلت نہیں، قیمتوں میں کمی کیلئے صوبائی و ضلعی انتظامیہ کو کردار ادا کرنے کی ہدایت کر دی گئی ہے۔