اسلام آباد : ڈسٹرکٹ اینڈ سیشن کورٹ اسلام آباد نے شہباز گل کیس کا ریکارڈ کل تک ہر صورت پیش کرنے کا حکم دے دیا۔ ایڈیشنل سیشن جج طاہر عباس سپرا نے شہباز گل کی درخواست ضمانت کی سماعت کی۔ ملزم کے وکیل علی بخاری اور فیصل چوہدری عدالت میں پیش ہوئے۔ جج نے پولیس افسر سے استفسار کرتے ہوئے کہا کہ  اگر آپکی کوئی ریزرویشن ہے تو بتا دیں۔ آپ کو کتنے دن چاہیے۔ پولیس افسر نے عدالت سے استدعا کی کہ تفتیشی کل شام کو واپس پہنچے گا آپ پیر تک سماعت ملتوی کر دیں۔ جج نے ملزم کے وکلاء سے مکالمہ کرتے ہوئے کہا کہ آپ تفتیشی افسر کے لیے ٹکٹ کا ارینج کر دیں۔ وکلاء نے کہا ہم تفتیشی افسر کو ایئر لائن کا ٹکٹ دینے کے لیے تیار ہیں۔ عدالت نے پولیس افسر کو مخاطب کرتے ہوئے کہا کہ کل تک ریکارڈ پیش نہ کیا گیا تو آپ کے افسران کے لیے مسئلہ بن جائیگا۔ عدالت نے سماعت کل 12 بجے تک ملتوی کر دی۔