پاکستان میں تعینات قطر کے سفیر شیخ سعود بن عبدالرحمان الثانی کی وزارتِ خارجہ میں وزیر خارجہ شاہ محمود قریشی سے ملاقات ہوئی جس میں انہوں نے شاہ محمود قریشی کو دوحہ فورم میں شرکت کے لیے دعوت نامہ دیا۔ دوران ملاقات دو طرفہ تعلقات اور مختلف شعبوں میں تعاون کے فروغ کے حوالے سے تبادلہ خیال کیا گیا۔ قطری سفیر نے قطر کے نائب وزیر اعظم و وزیر خارجہ کی جانب سے دوحہ فورم میں شرکت کا دعوت نامہ دیا۔ وزیر خارجہ نے اقوام متحدہ جنرل اسمبلی کے چھہترویں اجلاس کے موقع پر قطر کے نائب وزیر اعظم و وزیر خارجہ شیخ محمد بن عبدالرحمان الثانی کے ساتھ ہونے والی ملاقات کا حوالہ دیتے ہوئے پاکستان اور قطر کے مابین دو طرفہ تعلقات کو مزید مستحکم بنانے کے عزم کا اظہار کیا۔ شاہ محمود قریشی نے کہا کہ پاکستان، قطر کے ساتھ اپنے دو طرفہ تعلقات کو خصوصی اہمیت دیتا ہے۔ قطری سفیر نے وزیر خارجہ کا شکریہ ادا کرتے ہوئے پاکستان اور قطر کے مابین دو طرفہ تعلقات کو مزید مستحکم بنانے کے لیے اپنے ہر ممکن تعاون کی یقین دہانی کرائی۔