وزیراعظم عمران خان سیاسی محاذ پر سرگرم ہوگئے ہیں، جس کے بعد انہوں نے اراکین قومی اسمبلی سے ملاقاتوں کا فیصلہ کیا ہے۔ وزیراعظم ہاؤس سے جاری اطلاعات کے مطابق وزیراعظم عمران خان آج بروز ہفتہ 12 مارچ اور 13 مارچ کو ارکان قومی اسمبلی سے ملاقاتیں کریں گے۔ ملاقاتوں میں وزیراعظم اراکین کے مسائل سنیں گے، جب کہ ایم این ایز کے تحفظات دور کرنے سے متعلق بھی بات چیت کی جائے گی۔ وزیراعظم ہاؤس کی جانب سے ملاقات کرنے والے ارکان کی فہرست تیار کرلی گئی ہے۔ وزیراعظم اپنے ارکان اسمبلی کو اپنی حکمت عملی سے بھی اگاہ کریں گے۔ وزیراعظم ارکان قومی اسمبلی سے تحریک عدم اعتماد کے حوالے بات کریں گے۔ سیاسی حلقوں نے ملاقاتوں کے حوالے سے آئندہ کے دو دن اہم قرار دے دیئے ہیں۔ واضح رہے کہ اس سے قبل جمعہ 11 مارچ کو خیبر پختونخوا کے علاقے لوئر دیر میں جلسہ کرنے پر وزیراعظم عمران خان، گورنر اور وزیر اعلیٰ سمیت متعدد وفاقی اور صوبائی وزرا کو الیکشن کمیشن آف پاکستان (ای سی پی) نے ضابطہ اخلاق کی خلاف ورزی کرنے اور سرکاری مشینری استعمال کرتے ہوئے جلسہ کرنے پر نوٹس بھیج دیا ہے۔ ای سی پی کے لوئر دیر میں تعینات ڈسٹرکٹ مانیٹرنگ افسر کی جانب سے جاری نوٹس میں کہا گیا ہے کہ الیکشن کمیشن کو آئین پاکستان کی دفعات 140 اے (2)، 2018 (3) اور 219 (ڈی) کے تحت بلدیاتی انتخابات منعقد کروانے کا اختیار حاصل ہے۔ وزیراعظم کو جاری کیے نوٹس میں کہا گیا ہے کہ ای سی پی کو انتخابی سرگرمیوں کی نگرانی کے لیے مانیٹرنگ ٹیمیں تشکیل دینے کا بھی اختیار ہے اور اسی کے تحت ضلع لوئر دیر کی تمام 7 تحصیلوں میں ٹیمیں تشکیل دی گئیں۔ بیان میں کہا گیا کہ لوئر دیر میں تعینات مانیٹرنگ افسر نے آپ کو آگاہ کیا تھا کہ وزیراعظم سمیت سرکاری عہدیدار نہ تو انتخابی مہم میں شرکت کرسکتے ہیں اور نہ ہی مقامی کونسل میں ووٹ مانگ سکتے ہیں۔ مزید بتایا گیا ہے کہ اس دوران انتخابی شیڈول کے اعلان کے بعد کسی قسم کی ترقیاتی اسکیم کا بھی اعلان نہیں کیا جاسکتا ہے۔ الیکشن کمیشن نے وزیراعظم کے علاوہ خیبر پختونخوا کے گورنر شاہ فرمان، وزیر اعلیٰ خیبرپختونخوا محمود خان، وزیرخارجہ شاہ محمود قریشی، وزیرمنصوبہ بندی اسد عمر، وزیر دفاع پرویز خٹک، صوبائی وزیر انور زیب، وزیر اعلیٰ کے معاون خصوصی ملک شفیع اللہ اور رکن صوبائی اسمبلی لیاقت علی کو بھی قواعد کی خلاف ورزی پر 14 مارچ کو پیش ہونے کے لیے نوٹس بھیج دیا ہے۔ قبل ازیں الیکشن کمیشن نے انتخابی ضابطہ اخلاق پر کی گئی نظرثانی کے تحت وزیراعظم عمران خان کو لوئر دیر میں جلسہ کرنے سے منع کیا تھا۔ الیکشن کمیشن کے بیان کے مطابق نظرثانی کے بعد پارلیمینٹیرینز کو انتخابی مہم میں حصہ لینے کی اجازت دی گئی ہے تاہم عوامی عہدیداروں کے الیکشن مہم میں حصہ لینے پر پابندی ہوگی۔ لوئر دیر میں جلسہ عام سے خطاب میں وزیراعظم نے دعویٰ کیا تھا کہ آج کل اپوزیشن کے لوگ نوٹوں کے تھیلے، 15 سے 20 کروڑ روپے لے کر گھوم رہے ہیں، ہمارے اراکین قومی اسمبلی کو کہہ رہے ہیں کہ اپنا ضمیز بیچ دو، ساری قوم کے سامنے تماشا ہو رہا ہے۔