کراچی: معروف ماہر امراض خون ڈاکٹر طاہر شمسی کراچی میں انتقال کر گئے، وہ برین ہیمرج کے باعث آغا خان ہسپتال میں زیر علاج تھے۔ ڈاکٹر طاہر شمسی کی شعبہ طب میں شاندار خدمات ہیں، انہوں نے پہلی بار 1995میں بون میرو ٹرانسپلانٹ متعارف کرایا تھا، سیکڑوں افراد کا بون میرو ٹرانسپلانٹ کیا۔ ڈاکٹر طاہر شمسی نے کورونا کی پہلی لہر کے دوران پلازمہ سے علاج کا طریقہ دریافت کیا، سنہ 2016 میں ڈاکٹر طاہر شمسی کو امریکا میں لائف ٹائم اچیومنٹ ایوارڈ سے نوازا گیا۔ ڈاکٹر طاہر شمسی کو چند روز قبل برین ہیمرج کے سبب ہسپتال منتقل کیا گیا تھا جہاں ہنگامی بنیادوں پر ان کا آپریشن کیا گیا جسے ڈاکٹروں نے کامیاب قرار دیا تھا۔ بعد ازاں انہیں انتہائی نگہداشت کے وارڈ منتقل کیا گیا جہاں دوران علاج وہ انتقال کر گئے۔