فرح خان کے خلاف کيس ميں بڑی پيش رفت ہوئی ہے اور سماء انويسٹی گيشن يونٹ نے فرح کی 11 کمپنيوں کی تفصيلات حاصل کرلی ہیں۔ سابق خاتون اول بشریٰ بی بی کی دوست فرح خان عرف گوگی کے خلاف کیس میں اہم پیش رفت سامنے آئی ہے، نیب نے فرح خان کے اثاثوں کی تفصیلات 4 متعلقہ اداروں سے حاصل کرلی ہیں۔ نیب نے جن اداروں سے فرح گوگی کی اثاثوں کی تفصیلات حاصل کیں ان میں سیکیورٹی ایکسچینج کمیشن آف پاکستان (ایس ای سی پی)، ایف بی آر ، پنجاب ریوینو اتھارٹی اور اسلام آباد انتظامیہ شامل ہیں۔ سیکیورٹی ایکسچینج کمیشن آف پاکستان (ایس ای سی پی) نے نیب کو فرح خان کی 11 کمپنیوں کی تفصیلات مہیا کی ہیں، جس میں فرح خان کی والدہ بشریٰ خان اور شوہر احسن جمیل گجرکی کمپنیاں بھی شامل ہیں اور زيادہ تر کمپنياں پچھلے 4 سال کے دوران بنائی گئی ہیں۔ رپورٹ میں مزید بتایا گیا ہے کہ ان کمپنيوں ميں المعيز ڈيری، البراق، سینیٹوریا اسپتال اورغوثیہ بلڈرز شامل ہیں۔ دستاویزات کے مطابق المعز ڈیری اینڈ فوڈ پرائیویٹ لمیٹڈ اکتوبر2021 میں بنائی گئی، اس کی ڈائریکٹرز بشریٰ خان اور فرح خان ہیں۔ بشریٰ خان اور فرح خان کی مشترکہ ملکیت البراق ہائوسنگ پرائیویٹ لمیٹڈ کا قیام 2016 میں عمل میں لایا گیا اور اس کی فائلنگ فعال ہے۔ مئی 2018 میں دیان ڈیولپرز پرائیویٹ لمیٹڈ کا قیام عمل میں لایا گیا۔ اس کے چیف ایگزیکٹو آفیسر سلیم احمد جب کہ فرح اس کی ڈائریکٹر تھیں۔ دیان ڈیولپرز آف لائن طرز پر کام کر رہا ہے۔ احسان اقبال جمیل ، فرح خان، حمیرہ رحمان باجوہ، عرفان احمد ملک ، مظاہر بیگ اور نذر شاد مشترکہ طور پر سینیٹوریا ہسپتال مینجمنٹ کپمنی پرائیویٹ لمیٹڈ کے مالک ہیں۔ یہ کمپنی اکتوبر 2020 میں قائم ہوئی اور اس کی فائلنگ فعال نہیں۔ اپریل 2018 میں ڈاکٹرز کلینیکل کیئر پرائیویٹ لمیٹڈ کا قیام عمل میں لایا گیا جو احسن اقبال جمیل اور مسز فردوس اقبال کی ملکیت ہے۔ احسان جمیل 2003 میں قائم کی جانی والی غوثیہ بلڈرز لمیٹڈ کے چیف ایگزیکٹو آفیسر ہیں ۔ اس کا فائلنگ کا طریقہ کار فعال ہے۔ اے اینڈ ای پرائیویٹ لمیٹڈ بھی احسن جمیل کی ملکیت ہے۔ رپورٹ کے مطابق ان کمپنیوں کے دیگر شراکت داروں میں حميرا باجوہ،عرفان ملک،نذر مرشد اور فردوس اقبال بھی شامل ہیں۔ رپورٹ میں کمپنيوں کا کاروباری حجم 1 ارب روپے سے زيادہ بتايا گیا ہے اور احسن جمیل نے بھی تصدیق کی ہے کہ وہ اور ان کے اہل خانہ ان کمپنيوں کےعہدے دار ہيں۔ اس حوالے سے فرح کے شوہر احسن جمیل گجر نے سماء سے خصوصی کرتے ہوئے بتایا کہ کچھ کمپنیاں ہمارے نام پر تھیں، اس میں کچھ پارٹنرز بھی تھے، اور تمام جائیدادیں بھی ظاہر کی گئی ہیں۔ احسن جميل نے دعویٰ کیا ہے کہ کسی ايک کمپنی نے بھی 1 ارب روپے کا کاروبار نہيں کيا، تمام کمپنياں کاروبار کے ابتدائی مراحل ميں ہيں۔ احسن جميل کا یہ بھی کہنا تھا کہ انہیں اپنے بزنس پارٹنر مظاہر کو طلب کرنے کے بارے ميں علم نہيں جبکہ ايمنسٹی اسکیم سے فائدہ اٹھانے سے متعلق تفصيلات ياد نہيں۔