نزلہ، کھانسی اور بخار میں مبتلا مریضوں کو پہلے مرحلے میں چیک کیا جائے گا چین سے موصول ماسک محکموں اور ڈی ایم سیز میں تقسیم کیے جارہے ہیں،وسیم اختر کراچی : میئر کراچی وسیم اختر نے کہا ہے کہ چین سے موصول ہونے والے ماسک بلدیہ عظمٰی کراچی کے مختلف اسپتالوں اور محکموں سمیت تمام چھ ڈی ایم سیز اور ضلع کونسل میں تقسیم کیے جارہے ہیں، عباسی شہید اسپتال میں فلٹر کلینکس کھولے گئے ہیں جہاں نزلہ، کھانسی اور بخار میں مبتلا مریضوں کو پہلے مرحلے میں چیک کیا جائے گا اور اس کے بعد عام مریضوں کو دوا دے کر فارغ کر دیا جائے گا جبکہ ایسے مریض جن میں ذرا بھی کورونا وائرس کا شک پایا گیا انہیں ٹیسٹ کے لیے مخصوص اسپتالوں میں بھیج دیا جائے گا۔ان خیالات کا اظہار انہوں نے منگل کی دوپہر عباسی شہید اسپتال کے دورے کے موقع پر کیا، میٹرو پو لیٹن کمشنر ڈاکٹر سید سیف الرحمن، سینئر ڈائریکٹر کو آرڈینیشن مسعود عالم، سینئر ڈائریکٹر میڈیکل اینڈ ہیلتھ سروسز ڈاکٹر سلمیٰ کوثر، میڈیکل سپرنٹنڈنٹ ڈاکٹر ندیم راجپوت اور بلدیہ عظمٰی کراچی کے اسپتالوں کے میڈیکل سپر نٹنڈنٹس بھی موجود تھے۔میئر کراچی وسیم اختر نے ہدایت کی کہ عباسی شہید اسپتال میں ٹراما سینٹر کے داخلی دروازے کے قریب باہر کے مقام پر فلٹر کلینک قائم کیا جائے تاکہ آنے والے مریضوں کو فوری چیک کر لیا جائے۔ انہوں نے ہدایت کی کہ اسپتال کی سیڑھیوں سے منسلک دیواروں پر اسپرے کیا جائے اور تمام تر حفاظتی اقدامات یقینی بنائے جائیں۔اس موقع پر میٹرو پو لیٹن کمشنر ڈاکٹر سید سیف الرحمن نے ہدایت کی کہ اسپتال میں آنے والے مریضوں کا مکمّل ڈیٹا اسپتال انتظامیہ کے پاس موجود ہونا چاہیے ۔