لاہور : صوبہ پنجاب میں تمام نجی و سرکاری اسکولوں میں یکساں نصابِ تعلیم کے اطلاق کا مرحلہ وار آغاز کر دیا گیا ہے۔ تفصیلات کے مطابق وزیراعظم عمران خان کے ایک قوم ایک کتاب کے ویژن کو عملی جامہ بھی آج کے دن سے پہنایا جا رہا ہے،  پنجاب کے تمام نجی اور سرکاری اسکولوں میں یکساں نصابِ تعلیم کا اطلاق پہلے مرحلے میں پرائمری سطح سے کیا جائے گا۔صوبائی حکومت کی جانب سے سرکاری و نجی اسکولوں میں پرائمری تک یکساں نصاب تعلیم رائج کر دیا ہے۔ اس سے قبل وزیر تعلیم پنجاب ڈاکٹر مراد راس  نے کہا کہ دینی مدارس میں بھی پنجاب ٹیکسٹ بک بورڈ کی کتب ہی پڑھائی جائیں گی، سرکاری اور نجی اسکولوں کے اساتذہ کی یکساں نصاب تعلیم کے حوالے سے لرننگ مینجمنٹ سسٹم کے ذریعے تربیت بھی کی جارہی ہے۔  تاریخ میں پہلی بار اساتذہ کی آن لائن تربیت کے لئے کسی سسٹم کا قیام عمل میں لایا گیا ۔ صوبائی وزیر تعلیم نے تعلیمی ادارے  کے کھلنے سے متعلق مزید کہا  کہ تعلیمی اداروں میں کورونا ایس او پیز پر سختی سے عمل درآمد کرایا جائےگا جبکہ ایک دن میں 50 فیصد طلبہ کو ہی اسکولوں میں بلانے کی اجازت ہو گی۔ یاد رہے کہ سنگل نیشنل کریکولم پورے پاکستان میں نافذ کیا جائے گا جس سے تعلیمی شعبے میں طبقاتی تقسیم کا خاتمہ ہو گا، صوبہ پنجاب SNC پر عملدرآمد کروانے والا پہلا صوبہ بن گیا ہے۔ واضح رہے کہ صوبہ پنجاب میں تعلیمی اداروں میں گرمیوں کی چھٹیوں کے بعد تمام اسکول، کالجز اور یونیورسٹیاں 2 اگست یعنی آج سے کُھل گئی ہیں۔ عالمی وباکے باعث اس بار صوبہ پنجاب میں نیا تعلیمی سال کا آغاز بھی اپریل کی بجائے اگست سے شروع ہورہاہے ۔